തിരുവനന്തപുരം: രാജ്യത്ത് പാചകവാതക വിതരണ പ്രതിസന്ധി രൂക്ഷമായതോടെ ശക്തമായ സമരപരിപാടികളുമായി ഹോട്ടൽ ഉടമകൾ രംഗത്തെത്തിയിരിക്കുകയാണ്. വിതരണത്തിലെ കുറവ് ഹോട്ടൽ മേഖലയെ സ്തംഭിപ്പിച്ച സാഹചര്യത്തിൽ, തിങ്കളാഴ്ച സംസ്ഥാനവ്യാപകമായി കടകൾ അടച്ചിട്ട് സൂചന പണിമുടക്ക് നടത്താൻ കേരള ഹോട്ടൽ & റസ്റ്റോറന്റ് അസോസിയേഷൻ തീരുമാനിച്ചു. ഇതിന് മുന്നോടിയായി നാളെ എണ്ണക്കമ്പനികളുടെ ബോട്ലിംഗ് പ്ലാന്റുകളിലേക്ക് മാർച്ചും സംഘടിപ്പിക്കും. ഹോട്ടലുകളെ അവശ്യ സർവീസായി പ്രഖ്യാപിക്കണമെന്നും തടസ്സമില്ലാതെ പാചകവാതകം ലഭ്യമാക്കണമെന്നുമാണ് ഇവരുടെ പ്രധാന ആവശ്യം.
അതേസമയം, പാചകവാതക ക്ഷാമത്തിൽ ആശങ്കപ്പെടേണ്ട സാഹചര്യമില്ലെന്ന് കേന്ദ്ര സർക്കാർ ആവർത്തിച്ചു വ്യക്തമാക്കുന്നു. പ്രതിസന്ധി പരിഹരിക്കാനായി ഇറാനിൽ നിന്ന് കൂടുതൽ ടാങ്കറുകൾ ഇന്ത്യയിലെത്തിക്കാനുള്ള ഊർജ്ജിത ശ്രമങ്ങൾ നടന്നുവരികയാണ്. ഇതിനിടെ, വിപണിയിലെ കൃത്രിമക്ഷാമം തടയുന്നതിനായി രാജ്യവ്യാപകമായി നടത്തിയ പരിശോധനയിൽ പൂഴ്ത്തിവെച്ച 15,000 സിലിണ്ടറുകൾ അധികൃതർ പിടിച്ചെടുത്തു. പൂഴ്ത്തിവെപ്പിനെതിരെ വരും ദിവസങ്ങളിലും കർശന നടപടികൾ തുടരാനാണ് സർക്കാർ തീരുമാനം.
