ഇന്ത്യ ഉൾപ്പെടെയുള്ള സൗഹൃദ രാജ്യങ്ങൾക്കായി തന്ത്രപ്രധാനമായ ഹോർമുസ് കടലിടുക്ക് (Strait of Hormuz) തുറന്നുനൽകുമെന്ന് ഇറാൻ പ്രഖ്യാപിച്ചു. ഒരു തുള്ളി എണ്ണ പോലും ഈ പാതയിലൂടെ പുറത്തുവിടില്ലെന്ന കർശന നിലപാടിൽ നിന്നാണ് ഇറാൻ ഇപ്പോൾ പിന്നോട്ട് പോയിരിക്കുന്നത്. ഇന്ത്യ, റഷ്യ, ചൈന, പാകിസ്ഥാൻ, ഇറാഖ് എന്നീ രാജ്യങ്ങളുടെ കപ്പലുകൾക്ക് സുരക്ഷിതമായി കടന്നുപോകാമെന്ന് ഇറാൻ വിദേശകാര്യ മന്ത്രി അബ്ബാസ് അറാഗ്ചി അറിയിച്ചു. മുംബൈയിലെ ഇറാൻ കോൺസുലേറ്റ് ജനറൽ വഴിയാണ് ഈ വിവരം പുറത്തുവിട്ടത്.
ഹോർമുസ് കടലിടുക്ക് അടച്ചിടരുതെന്നും ആഗോള ചരക്കുനീക്കം തടസ്സപ്പെടുത്തരുതെന്നും യുഎൻ സെക്രട്ടറി ജനറൽ അന്റോണിയോ ഗുട്ടെറസ് നേരത്തെ ആവശ്യപ്പെട്ടിരുന്നു. ഇതിന് പിന്നാലെ ഇന്ത്യൻ പ്രധാനമന്ത്രി നരേന്ദ്ര മോദിയും ഇറാൻ പ്രസിഡന്റ് മസൂദ് പെസെഷ്കിയാനും തമ്മിൽ നടത്തിയ നിർണ്ണായക ചർച്ചകളാണ് ഇറാന്റെ നിലപാട് മാറ്റത്തിന് പ്രധാന കാരണമായത്. ഇതിനോടകം തന്നെ ഇന്ത്യയുടെ രണ്ട് കപ്പലുകൾ സുരക്ഷിതമായി ഈ പാത കടന്നുപോയതായാണ് റിപ്പോർട്ടുകൾ സൂചിപ്പിക്കുന്നത്.
അതേസമയം, അമേരിക്ക, ഇസ്രായേൽ തുടങ്ങിയ ശത്രുരാജ്യങ്ങൾക്കും അവരുടെ സഖ്യകക്ഷികൾക്കും ഈ പാതയിലൂടെ പ്രവേശനം അനുവദിക്കില്ലെന്ന് ഇറാൻ വ്യക്തമാക്കിയിട്ടുണ്ട്. രാജ്യം നിലവിൽ യുദ്ധസമാനമായ സാഹചര്യത്തിലാണെന്നും, ശത്രുപക്ഷത്തുള്ളവരുടെ കപ്പലുകൾ കടത്തിവിടാൻ കഴിയില്ലെന്നും അബ്ബാസ് അറാഗ്ചി പറഞ്ഞു. പല രാജ്യങ്ങളും കപ്പൽ ഉടമകളും സുരക്ഷിതമായ യാത്രയ്ക്കായി ഇറാന്റെ സഹായം തേടിയിരുന്നു. ഇതിന്റെ അടിസ്ഥാനത്തിൽ സൗഹൃദ രാജ്യങ്ങളുടെ കപ്പലുകൾക്ക് ഇറാൻ സായുധ സേന കടന്നുപോകാൻ അനുമതി നൽകിയതായി വാർത്താ ഏജൻസിയായ റോയിട്ടേഴ്സ് റിപ്പോർട്ട് ചെയ്തു.
