മനുഷ്യ ചരിത്രത്തിലെ പുതിയൊരു സുവർണ്ണ അധ്യായം രചിച്ച് ആർട്ടെമിസ് 2 ദൗത്യസംഘം വിജയകരമായി ഭൂമിയിൽ തിരിച്ചെത്തി. പത്ത് ദിവസം നീണ്ടുനിന്ന പര്യവേക്ഷണത്തിന് ശേഷം, ഇന്ത്യൻ സമയം പുലർച്ചെ 5.07-ഓടെ ഭൗമാന്തരീക്ഷത്തിൽ പ്രവേശിച്ച ഒറയോൺ പേടകം, 5.37-ന് സാന്റിയാഗോ തീരത്തിന് സമീപം ശാന്തസമുദ്രത്തിൽ സ്പ്ലാഷ് ഡൗൺ നടത്തി. 1972-ലെ അപ്പോളോ 17-ന് ശേഷം ചന്ദ്രന്റെ ഭ്രമണപഥത്തിലേക്ക് മനുഷ്യനെ എത്തിച്ച ആദ്യ ദൗത്യമാണിത്. 2022-ൽ നടന്ന ആർട്ടെമിസ് 1 എന്ന പരീക്ഷണ ദൗത്യത്തിന്റെ വിജയത്തിന് ശേഷമാണ് മനുഷ്യരെ ഉൾപ്പെടുത്തിക്കൊണ്ടുള്ള ഈ ദൗത്യം നാസ പൂർത്തിയാക്കിയത്.
അമ്പത്തിനാല് വർഷത്തെ ഇടവേളയ്ക്ക് ശേഷം ചന്ദ്രന്റെ മറുപുറം കണ്ട് മടങ്ങിയെത്തിയ യാത്രികർ എന്ന നേട്ടം ഇതോടെ ഈ സംഘത്തിന് സ്വന്തമായി. ഭൂമിയിൽ നിന്ന് നേരിട്ട് കാണാൻ കഴിയാത്ത ചന്ദ്രന്റെ വിദൂരവശം (Far side) ചുറ്റിയുള്ള യാത്രയ്ക്കിടെ, ഏകദേശം 40 മിനിറ്റോളം പേടകത്തിന് ഭൂമിയിൽ നിന്നുള്ള ബന്ധം നഷ്ടമായിരുന്നു. ചന്ദ്രന്റെ പിന്നിലേക്ക് പേടകം മറഞ്ഞതിനാലായിരുന്നു ഈ വാർത്താവിനിമയ തടസ്സം നേരിട്ടത്. എങ്കിലും നിശ്ചയിച്ച പാതയിലൂടെ സുരക്ഷിതമായി സഞ്ചരിച്ച് സംഘം തിരിച്ചെത്തി.
ബഹിരാകാശ ചരിത്രത്തിലെ റെക്കോർഡുകൾ തിരുത്തിക്കുറിച്ച യാത്രയായിരുന്നു ഇത്. ഭൂമിയിൽ നിന്ന് ഏറ്റവും കൂടുതൽ ദൂരം സഞ്ചരിച്ച മനുഷ്യരെന്ന ഖ്യാതി ഇനി ആർട്ടെമിസ് 2 സംഘത്തിന് സ്വന്തമാണ്. 1970-ൽ അപ്പോളോ 13 ദൗത്യം സ്ഥാപിച്ച 4,00,171 കിലോമീറ്റർ എന്ന ദൂരപരിധി ഇന്നലെ രാത്രി 11.26-ഓടെ ഒറയോൺ മറികടന്നു. ഇന്ന് പുലർച്ചെ 4.37-ഓടെ ഭൂമിയിൽ നിന്നും 4,06,771 കിലോമീറ്റർ അകലെ എത്തിയതോടെ മനുഷ്യൻ ബഹിരാകാശത്ത് സഞ്ചരിച്ച പരമാവധി ദൂരമെന്ന പുതിയ റെക്കോർഡ് സ്ഥാപിതമായി.
ചന്ദ്രനിൽ വീണ്ടും മനുഷ്യനെ ഇറക്കാനുള്ള അമേരിക്കയുടെ ബൃഹത്തായ പദ്ധതിയുടെ നിർണ്ണായക ചുവടുവെപ്പാണ് ഈ വിജയം. ചൈനയെ മറികടന്ന് ചന്ദ്രനിൽ ആധിപത്യം ഉറപ്പിക്കാനാണ് നാസ ലക്ഷ്യമിടുന്നത്. നിലവിലെ പദ്ധതികൾ പ്രകാരം ആർട്ടെമിസ് നാലാം ദൗത്യത്തിലായിരിക്കും മനുഷ്യൻ വീണ്ടും ചന്ദ്രോപരിതലത്തിൽ കാൽകുത്തുക. ആർട്ടെമിസ് 2-ന്റെ ഈ വിജയം വരാനിരിക്കുന്ന ദൗത്യങ്ങൾക്ക് വലിയ ആത്മവിശ്വാസമാണ് നൽകുന്നത്.
