ബീഹാർ നിയമസഭാ തിരഞ്ഞെടുപ്പിന്റെ അവസാന ഘട്ട പോളിംഗ് ഇന്ന് നടക്കും. ഈ ഘട്ടത്തിൽ 20 ജില്ലകളിലായി 122 മണ്ഡലങ്ങളിലാണ് വോട്ടെടുപ്പ് നടക്കുന്നത്. 3.7 കോടി വോട്ടർമാർ ഇന്ന് തങ്ങളുടെ സമ്മതിദാനാവകാശം വിനിയോഗിക്കും. ആകെ 1302 സ്ഥാനാർത്ഥികളാണ് മത്സരരംഗത്തുള്ളത്.
വോട്ടെടുപ്പിനായി 45,339 പോളിംഗ് സ്റ്റേഷനുകൾ സജ്ജീകരിച്ചിട്ടുണ്ട്. രാവിലെ ഏഴ് മണിക്ക് ആരംഭിക്കുന്ന പോളിംഗ് വൈകിട്ട് അഞ്ച് മണി വരെ നീളും. അടുത്തിടെ ദില്ലിയിൽ നടന്ന സ്ഫോടനത്തിന്റെ പശ്ചാത്തലത്തിൽ, എല്ലാ പോളിംഗ് ബൂത്തുകളിലും സുരക്ഷ കർശനമാക്കിയിട്ടുണ്ട്.
ആദ്യ ഘട്ടത്തിൽ 64.66 ശതമാനം പോളിംഗ് രേഖപ്പെടുത്തിയിരുന്നു. ഇതിന് സമാനമായ മികച്ച പോളിംഗ് രണ്ടാം ഘട്ടത്തിലും രാഷ്ട്രീയ പാർട്ടികൾ പ്രതീക്ഷിക്കുന്നു. വോട്ടെടുപ്പ് അവസാനിച്ചതിന് ശേഷം വൈകുന്നേരത്തോടെ എക്സിറ്റ് പോൾ ഫലങ്ങളും പുറത്തുവരും.
വോട്ടർ പട്ടിക: ഹർജികൾ ഇന്ന് സുപ്രീം കോടതിയിൽ
അതേസമയം, ബീഹാർ തിരഞ്ഞെടുപ്പുമായി ബന്ധപ്പെട്ട് വോട്ടർ പട്ടികയിൽ നടത്തിയ തീവ്ര പരിഷ്കരണത്തിനെതിരായ ഹർജികൾ സുപ്രീം കോടതി ഇന്ന് പരിഗണിക്കും. ജസ്റ്റിസ് സൂര്യകാന്ത് അധ്യക്ഷനായ ബെഞ്ചാണ് ഈ ഹർജികൾ കേൾക്കുന്നത്. ബീഹാറിലെ അന്തിമ വോട്ടർ പട്ടികയിൽ വരുത്തിയ മാറ്റങ്ങൾ എഴുതി നൽകാൻ കോടതി തിരഞ്ഞെടുപ്പ് കമ്മീഷനോട് നേരത്തെ ആവശ്യപ്പെട്ടിരുന്നു. ഇതിനൊപ്പം തമിഴ്നാട്, പശ്ചിമ ബംഗാൾ എന്നിവിടങ്ങളിലെ എസ്ഐആറിനെതിരായ (SIR) ഹർജികളും സുപ്രീം കോടതി ഇന്ന് പരിഗണിക്കുന്നതാണ്.
