തിരുവനന്തപുരം: കേരളത്തിൽ യുഡിഎഫിന് അനുകൂലമായ രാഷ്ട്രീയ സാഹചര്യമാണുള്ളതെന്നും 96 സീറ്റുകൾ നേടി മുന്നണി അധികാരത്തിലെത്തുമെന്നും കർണാടക ഉപമുഖ്യമന്ത്രി ഡി.കെ. ശിവകുമാർ പറഞ്ഞു. അധികാരത്തിൽ വന്നാൽ വാഗ്ദാനം ചെയ്തതുപോലെ ‘ഇന്ദിര ഗ്യാരണ്ടി സ്കീം’ നടപ്പിലാക്കുമെന്നും അദ്ദേഹം വ്യക്തമാക്കി. പറഞ്ഞ വാക്ക് പാലിക്കുന്ന പാരമ്പര്യമാണ് കോൺഗ്രസിനുള്ളതെന്നും കർണാടകയിലും തെലങ്കാനയിലും ഇത് തെളിയിച്ചതാണെന്നും തിരുവനന്തപുരത്ത് അദ്ദേഹം കൂട്ടിച്ചേർത്തു.
സിപിഎമ്മും ബിജെപിയും തമ്മിൽ വലിയ രീതിയിലുള്ള രാഷ്ട്രീയ ധാരണയുണ്ടെന്നും ശിവകുമാർ ആരോപിച്ചു. തമിഴ്നാട്ടിലെയും കർണാടകയിലെയും മന്ത്രിമാരെ കേന്ദ്രം വേട്ടയാടുമ്പോൾ കേരളത്തിൽ അത്തരമൊരു സാഹചര്യം ഇല്ലാത്തത് ഈ അന്തർധാരയുടെ ഫലമാണ്. മുഖ്യമന്ത്രിയുടെ കുടുംബത്തിനെതിരെ അഴിമതി ആരോപണങ്ങൾ ഉയർന്നിട്ടും ഒരു അന്വേഷണവും നടക്കാത്തത് ബിജെപിയുമായുള്ള ഡീൽ കാരണമാണെന്നും അദ്ദേഹം കുറ്റപ്പെടുത്തി.
