ആലപ്പുഴ: സിപിഎം നേതൃത്വത്തിനെതിരെ കടുത്ത വിമർശനങ്ങളുമായി മുതിർന്ന നേതാവ് ജി. സുധാകരൻ രംഗത്തെത്തി. പാർട്ടി മെമ്പർഷിപ്പ് പുതുക്കില്ലെന്ന് പ്രഖ്യാപിച്ച അദ്ദേഹം, തന്നെ അവഗണിക്കുന്ന നേതൃത്വത്തിന്റെ നിലപാടിൽ പരസ്യമായി അമർഷം രേഖപ്പെടുത്തി. സംസ്ഥാന കമ്മിറ്റിയിൽ നിന്ന് ബ്രാഞ്ച് കമ്മിറ്റിയിലേക്ക് മാറിയ ശേഷം ഒരുതവണ പോലും ജില്ലാ സെക്രട്ടറി തന്നെ അന്വേഷിച്ചില്ലെന്നും പൊതുപരിപാടികളിൽ ബോധപൂർവം മാറ്റിനിർത്തുകയാണെന്നും അദ്ദേഹം ആരോപിച്ചു.
പാർട്ടി സംസ്ഥാന സെക്രട്ടറി എം.വി. ഗോവിന്ദന്റെ നിലപാടുകളെ സുധാകരൻ രൂക്ഷമായി വിമർശിച്ചു. താൻ പരിഗണന അർഹിക്കുന്നില്ലെന്ന ഗോവിന്ദന്റെ പ്രയോഗം ശരിയായില്ലെന്നും, തന്നെ കളിയാക്കി ചിരിച്ച സെക്രട്ടറിയെ തിരുത്താൻ പാർട്ടിയിൽ ആരും തയ്യാറായില്ലെന്നും അദ്ദേഹം പറഞ്ഞു. അടിയന്തരാവസ്ഥയുടെ അൻപതാം വാർഷികം ആഘോഷിച്ചപ്പോൾ പോലും തനിക്ക് ക്ഷണക്കത്ത് നൽകിയില്ലെന്ന പരിഭവം അദ്ദേഹം പങ്കുവെച്ചു.
നിയമസഭാ സീറ്റ് നിഷേധിച്ചതിനെത്തുടർന്ന് പാർട്ടിയിൽ നിന്ന് അകന്നുനിൽക്കുന്ന സുധാകരൻ, ആദർശങ്ങളിലും ആശയങ്ങളിലും വിട്ടുവീഴ്ചയില്ലാതെ ജനലക്ഷങ്ങൾക്കൊപ്പം നിലകൊള്ളുമെന്ന് വ്യക്തമാക്കി. എം.വി. ഗോവിന്ദന്റെ വാർത്താ സമ്മേളനത്തിലെ വിവാദ പരാമർശങ്ങൾ ഉൾപ്പെടുത്തിക്കൊണ്ടുള്ള ഫേസ്ബുക്ക് പോസ്റ്റിലൂടെയാണ് സുധാകരൻ തന്റെ നിലപാട് പരസ്യമാക്കിയത്.
