തിരുവനന്തപുരം: പശ്ചിമേഷ്യയിലെ സംഘർഷഭരിതമായ സാഹചര്യം കണക്കിലെടുത്ത് ഗൾഫ് രാജ്യങ്ങളിലെ എസ്എസ്എൽസി, പ്ലസ്ടു പരീക്ഷകൾ മാറ്റിവെച്ചു. ഇറാനെതിരെ അമേരിക്കയും ഇസ്രയേലും നടത്തുന്ന ആക്രമണങ്ങൾ തുടരുന്ന പശ്ചാത്തലത്തിൽ ഗൾഫ് മേഖലയിൽ കനത്ത ജാഗ്രത നിലനിൽക്കുന്നതിനാലാണ് ഈ തീരുമാനം. മാർച്ച് അഞ്ചിന് ആരംഭിക്കേണ്ടിയിരുന്ന പത്താം ക്ലാസ് പരീക്ഷയും, മാർച്ച് അഞ്ച്, ആറ്, ഏഴ് തീയതികളിൽ നടക്കേണ്ടിയിരുന്ന പ്ലസ്ടു പരീക്ഷകളുമാണ് നിലവിൽ മാറ്റിവെച്ചിരിക്കുന്നത്. പുതുക്കിയ പരീക്ഷാ തീയതികൾ അധികൃതർ പിന്നീട് അറിയിക്കും.
യുദ്ധസമാനമായ സാഹചര്യം കണക്കിലെടുത്ത് ഗൾഫിലെ വിദ്യാഭ്യാസ സ്ഥാപനങ്ങൾക്ക് നിലവിൽ അവധി നൽകിയിരിക്കുകയാണ്. കേരളത്തിലും ഗൾഫ് രാജ്യങ്ങളിലും ഒരേ ചോദ്യപേപ്പർ ഉപയോഗിച്ചാണ് പരീക്ഷകൾ നടത്താറുള്ളത്. ഈ പ്രത്യേക സാഹചര്യം പരിഗണിച്ച് പരീക്ഷകൾ മാറ്റിവെക്കണമെന്ന് ഗൾഫിലെ കേരള പരീക്ഷാ കോർഡിനേറ്റർ നേരത്തെ സർക്കാരിനോട് ശുപാർശ ചെയ്തിരുന്നു. ഇതിന് പിന്നാലെയാണ് ഔദ്യോഗിക തീരുമാനം പുറത്തുവന്നത്.
ഗൾഫ് മേഖലയിലെ ആശങ്ക കണക്കിലെടുത്ത് ബഹ്റൈൻ, കുവൈറ്റ്, ഒമാൻ, ഖത്തർ, സൗദി അറേബ്യ, യുഎഇ എന്നീ രാജ്യങ്ങളിലെയും ഇറാനിലെയും സിബിഎസ്ഇ പത്ത്, പന്ത്രണ്ട് ക്ലാസ്സുകളിലെ ബോർഡ് പരീക്ഷകൾ കഴിഞ്ഞ ഞായറാഴ്ച തന്നെ മാറ്റിവെച്ചിരുന്നു. വിദ്യാർത്ഥികളുടെ സുരക്ഷ മുൻനിർത്തിയാണ് വിവിധ വിദ്യാഭ്യാസ ബോർഡുകൾ ഇത്തരമൊരു നടപടി സ്വീകരിച്ചിരിക്കുന്നത്.
