ഇസ്രായേലിലെ അതീവ സുരക്ഷാ മേഖലയായ ആണവ ഗവേഷണ കേന്ദ്രത്തിന് സമീപം ഇറാൻ നടത്തിയ മിസൈൽ ആക്രമണത്തിൽ വലിയ നാശനഷ്ടങ്ങൾ സംഭവിച്ചു. തെക്കൻ ഇസ്രായേലിലെ ദിമോണ (Dimona), അരാദ് (Arad) എന്നീ നഗരങ്ങളെ ലക്ഷ്യം വെച്ചായിരുന്നു ഇറാന്റെ നീക്കം. മൂന്നാഴ്ച പിന്നിടുന്ന യുദ്ധത്തിലെ ഏറ്റവും നിർണ്ണായകമായ ഘട്ടമായാണ് ഈ ആക്രമണം വിലയിരുത്തപ്പെടുന്നത്. ലക്ഷ്യസ്ഥാനങ്ങളിൽ മിസൈലുകൾ നേരിട്ട് പതിച്ചതായും ആക്രമണത്തിൽ പരിക്കേറ്റ പത്തോളം പേരെ ആശുപത്രിയിൽ പ്രവേശിപ്പിച്ചതായും റിപ്പോർട്ടുകളുണ്ട്. ഇതിൽ പലരുടെയും നില ഗുരുതരമായി തുടരുകയാണ്.
ഇറാന്റെ മിസൈലുകളെ തടയുന്നതിൽ തങ്ങളുടെ അത്യാധുനിക പ്രതിരോധ സംവിധാനങ്ങൾ പരാജയപ്പെട്ടതായി ഇസ്രായേൽ സൈന്യം സമ്മതിച്ചു. ‘ടു-സ്റ്റേജ് ഇന്റർകോണ്ടിനെന്റൽ ബാലിസ്റ്റിക് മിസൈൽ’ (Two-stage ICBM) ആണ് ഇറാൻ ഈ ആക്രമണത്തിനായി ഉപയോഗിച്ചതെന്ന് ഇസ്രായേൽ സൈനിക മേധാവി ജനറൽ ഇയാൽ സാമിർ വ്യക്തമാക്കി. ഇറാന്റെ മിസൈൽ സാങ്കേതികവിദ്യയുടെ കരുത്ത് തെളിയിക്കുന്നതായിരുന്നു ഈ ആക്രമണമെന്നും അദ്ദേഹം കൂട്ടിച്ചേർത്തു.
തങ്ങളുടെ ആണവ കേന്ദ്രങ്ങൾക്ക് നേരെ നേരത്തെ നടന്ന ആക്രമണങ്ങൾക്കുള്ള മറുപടിയായാണ് ഇറാൻ ഈ നീക്കം നടത്തിയത്. വരും ദിവസങ്ങളിൽ ആക്രമണം ശക്തമാക്കുമെന്നും യുദ്ധം പെട്ടെന്നൊന്നും അവസാനിക്കില്ലെന്നും ഇസ്രായേൽ പ്രതിരോധ മന്ത്രി ഇസ്രായേൽ കാറ്റ്സ് പ്രഖ്യാപിച്ചിട്ടുണ്ട്. അതേസമയം, പശ്ചിമേഷ്യയിലെ യുദ്ധം ആഗോളതലത്തിൽ വലിയ ആശങ്കയുണ്ടാക്കുന്നതിനിടെ, യുദ്ധം അവസാനിപ്പിക്കാനുള്ള നീക്കങ്ങൾ അമേരിക്ക ആരംഭിച്ചതായാണ് വിവരം. മേഖലയിൽ സമാധാനം പുനഃസ്ഥാപിക്കാൻ താൻ ആഗ്രഹിക്കുന്നതായി ട്രംപ് അറിയിച്ചതായി വൈറ്റ് ഹൗസ് വൃത്തങ്ങളെ ഉദ്ധരിച്ചുള്ള റിപ്പോർട്ടുകൾ സൂചിപ്പിക്കുന്നു.
