തിരുവനന്തപുരം: സംസ്ഥാനത്തെ ബാറുകളുടെ പ്രവർത്തനസമയം വർദ്ധിപ്പിച്ചുകൊണ്ട് സർക്കാർ പുതിയ ഉത്തരവ് പുറപ്പെടുവിച്ചു. നിലവിലുണ്ടായിരുന്ന സമയക്രമത്തിൽ മാറ്റം വരുത്തിക്കൊണ്ട് രണ്ട് മണിക്കൂർ കൂടി അധികമായാണ് സമയം നീട്ടിനൽകിയിരിക്കുന്നത്. ഇതോടെ സംസ്ഥാനത്തെ 884 ബാറുകൾക്കും ബിയർ-വൈൻ പാർലറുകൾക്കും രാവിലെ 10 മണി മുതൽ രാത്രി 12 മണി വരെ പ്രവർത്തിക്കാനും മദ്യം വിളമ്പാനും സാധിക്കും. ബാറുകളുടെ പ്രവർത്തനസമയം ഏകീകരിക്കുന്നതിന്റെ ഭാഗമായാണ് ഏറെക്കാലമായുള്ള ബാറുടമകളുടെ ഈ ആവശ്യം സർക്കാർ അംഗീകരിച്ചത്.
പഞ്ചനക്ഷത്ര ബാറുകൾക്കും ഈ ഉത്തരവ് വലിയ നേട്ടമാണ് നൽകുന്നത്. അഞ്ചു ലക്ഷം രൂപ അധികമായി അടയ്ക്കുന്ന പഞ്ചനക്ഷത്ര ബാറുകൾക്ക് പുലർച്ചെ മൂന്ന് മണി വരെ മദ്യം വിളമ്പാൻ പ്രത്യേകാനുമതി ലഭിക്കും. എന്നാൽ ക്ലബ്ബുകളുടെ പ്രവർത്തനസമയത്തിൽ മാറ്റങ്ങളൊന്നും വരുത്തിയിട്ടില്ല. കൂടാതെ, തൊട്ടടുത്ത ദിവസം ഡ്രൈഡേ ആണെങ്കിൽ രാത്രി വൈകി പ്രവർത്തിക്കാനുള്ള ഈ പ്രത്യേക ആനുകൂല്യം ബാറുകൾക്ക് ലഭ്യമാകില്ലെന്നും സർക്കാർ വ്യക്തമാക്കിയിട്ടുണ്ട്.
