കൊച്ചി: സിനിമാ സെറ്റിൽ വെച്ച് സംവിധായകൻ സനോജ് മിശ്ര തന്നോട് മോശമായി പെരുമാറിയെന്നും പലതവണ ശരീരത്തിൽ കയറിപ്പിടിച്ചെന്നും വെളിപ്പെടുത്തി കുംഭമേളയിലൂടെ വൈറലായ പെൺകുട്ടി മൊണാലിസ രംഗത്തെത്തി. കൊച്ചിയിൽ നടത്തിയ വാർത്താ സമ്മേളനത്തിൽ പൊട്ടിക്കരഞ്ഞുകൊണ്ടാണ് തനിക്ക് നേരിട്ട ദുരനുഭവങ്ങൾ അവർ പങ്കുവെച്ചത്. ഭർത്താവ് ഫർമാൻ ഖാനൊപ്പമാണ് മൊണാലിസ മാധ്യമങ്ങളെ കണ്ടത്. തനിക്ക് 18 വയസ് തികയുന്നതിന് മുൻപാണ് ഈ സംഭവങ്ങൾ ഉണ്ടായതെന്നും സംവിധായകനെതിരെ നിയമനടപടി സ്വീകരിക്കുന്നതിനെക്കുറിച്ച് ആലോചിക്കുകയാണെന്നും അവർ വ്യക്തമാക്കി.
സിനിമയിലെ ദുരനുഭവത്തെക്കുറിച്ച് നേരത്തെ വീട്ടുകാരോട് പറഞ്ഞിരുന്നെങ്കിലും കരിയറിലെ ആദ്യത്തെ സിനിമയായതിനാൽ അവർ അത് കാര്യമാക്കിയില്ലെന്ന് മൊണാലിസ പറഞ്ഞു. വീട്ടുകാരുടെ പിന്തുണ ലഭിക്കാത്തതിനാലാണ് അന്ന് പരാതിപ്പെടാൻ കഴിയാതിരുന്നത്. അടുത്തിടെ കേരളത്തിൽ വെച്ചായിരുന്നു മൊണാലിസയുടെയും ഫർമാൻ ഖാന്റെയും വിവാഹം നടന്നത്. നിലവിൽ കേരളത്തിൽ താമസിക്കുന്ന ഇവർക്ക് സ്വന്തം നാട്ടിലേക്ക് മടങ്ങാൻ ആഗ്രഹമുണ്ടെങ്കിലും അത് വലിയ വെല്ലുവിളികൾ നിറഞ്ഞതാണെന്ന് മൊണാലിസ വാർത്താ സമ്മേളനത്തിൽ കൂട്ടിച്ചേർത്തു.
