ന്യൂ ഡൽഹി: ഏറ്റവും കൂടുതൽ കാലം ഇന്ത്യയിൽ ഒരു ഗവൺമെന്റിന്റെ തലവനായിരുന്ന വ്യക്തി എന്ന ചരിത്ര നേട്ടമാണ് പ്രധാനമന്ത്രി നരേന്ദ്ര മോദി സ്വന്തമാക്കിയത്. ഞായറാഴ്ച അധികാരത്തിൽ 8,931 ദിവസങ്ങൾ പൂർത്തിയാക്കിയതോടെയാണ് അദ്ദേഹം ഈ റെക്കോർഡ് തിരുത്തിക്കുറിച്ചത്. മുൻ സിക്കിം മുഖ്യമന്ത്രിയായിരുന്ന പവൻ കുമാർ ചാംലിംഗിന്റെ പേരിലായിരുന്നു ഇതിനുമുമ്പ് ഈ റെക്കോർഡ് ഉണ്ടായിരുന്നത്.
തുടർച്ചയായി 8,930 ദിവസങ്ങൾ ഒരു സർക്കാരിനെ നയിച്ച വ്യക്തിയായിരുന്നു പവൻ കുമാർ ചാംലിംഗ്. 1994 മുതൽ 2019 വരെയുള്ള കാൽനൂറ്റാണ്ടുകാലം (25 വർഷം) അദ്ദേഹം സിക്കിം മുഖ്യമന്ത്രിയായി സേവനമനുഷ്ഠിച്ചിരുന്നു. ഗുജറാത്ത് മുഖ്യമന്ത്രിയായും പിന്നീട് ഇന്ത്യയുടെ പ്രധാനമന്ത്രിയായും സേവനമനുഷ്ഠിച്ച കാലയളവ് ചേർത്താണ് നരേന്ദ്ര മോദി ഇപ്പോൾ ചാംലിംഗിനെ മറികടന്നിരിക്കുന്നത്. ഇന്ത്യയിൽ ഒരു സർക്കാർ തലവൻ ഭരിച്ചതിൽ വച്ച് ഏറ്റവും ദൈർഘ്യമേറിയ കാലാവധി എന്ന ഖ്യാതി ഇനി മോദിക്ക് സ്വന്തം.
