മുല്ലപ്പെരിയാർ: റൂൾ കർവ് പരിധി മറികടന്നു; പെരിയാർ തീരത്തുള്ളവർക്ക് അതീവ ജാഗ്രതാ നിർദ്ദേശം, ജില്ലയിൽ മഴ ശക്തം

ഇടുക്കി : തീവ്രമായ മഴയെത്തുടർന്ന് മുല്ലപ്പെരിയാർ അണക്കെട്ടിലെ ജലനിരപ്പ് ഉയരുന്ന സാഹചര്യത്തിൽ തമിഴ്നാട് അധികൃതർ നിയന്ത്രണങ്ങൾ ഏർപ്പെടുത്തി. നിലവിൽ 138.25 അടിയിലെത്തിയ ജലനിരപ്പ്, റൂൾ കർവ് പരിധിയായ 137.70 അടി മറികടന്നതിനാലാണ് നടപടി. ഡാമിലെ മൂന്ന് സ്പിൽവേ ഷട്ടറുകൾ 75 സെന്റീമീറ്റർ വീതം ഉയർത്തി, അധികമുള്ള 1063 ഘനയടി വെള്ളം പെരിയാർ നദിയിലേക്ക് ഒഴുക്കിവിടാൻ തീരുമാനിച്ചു.ശനിയാഴ്ച പുലർച്ചെ ജലനിരപ്പ് 136.00 അടിയിലേക്ക് താഴ്ന്നിരുന്നെങ്കിലും, വൃഷ്ടിപ്രദേശങ്ങളിൽ ലഭിച്ച കനത്ത മഴ കാരണം ഡാമിലേക്കുള്ള നീരൊഴുക്ക് വർധിക്കുകയായിരുന്നു. അതിനാൽ, പെരിയാർ നദിയുടെ തീരത്തുള്ളവർ അതീവ ജാഗ്രത പാലിക്കണമെന്ന് ഇടുക്കി ജില്ലാ ഭരണകൂടം മുന്നറിയിപ്പ് നൽകി.ഇടുക്കി ജില്ലയിൽ കഴിഞ്ഞ ദിവസം ശക്തമായ മഴ രേഖപ്പെടുത്തി: കൂട്ടാറിൽ 100 മില്ലീമീറ്ററും വെള്ളയാംകുടിയിൽ 188 മില്ലീമീറ്ററും മഴ ലഭിച്ചു. കേന്ദ്ര കാലാവസ്ഥാ വകുപ്പ് സംസ്ഥാനത്ത് ഇന്നും ശക്തമായ മഴ തുടരുമെന്ന് മുന്നറിയിപ്പ് നൽകിയിട്ടുണ്ട്. പത്തനംതിട്ട, കോട്ടയം, എറണാകുളം, ഇടുക്കി, തൃശൂർ, പാലക്കാട്, മലപ്പുറം, കോഴിക്കോട്, വയനാട് ജില്ലകളിൽ യെല്ലോ അലർട്ട് പ്രഖ്യാപിച്ചിരിക്കുന്നു.മലയോര മേഖലകളിൽ മഴ കനക്കാൻ സാധ്യതയുള്ളതിനാൽ ഉച്ചയ്ക്കു ശേഷം ഇടിമിന്നലോടും കാറ്റോടും കൂടിയ മഴയുണ്ടാകാൻ സാധ്യതയുണ്ട്.ഇതിനിടെ, തെക്ക് കിഴക്കൻ അറബിക്കടലിലും ലക്ഷദ്വീപ് പ്രദേശങ്ങളിലും രൂപം കൊണ്ട ചക്രവാതച്ചുഴി ന്യൂനമർദ്ദമായി ശക്തിപ്പെടാൻ സാധ്യതയുള്ളതിനാലും, ശക്തമായ കാറ്റും കടൽ പ്രക്ഷുബ്ധതയും കണക്കിലെടുത്തും കേരള-കർണാടക-ലക്ഷദ്വീപ് തീരങ്ങളിൽ മീൻപിടുത്തത്തിന് വിലക്കേർപ്പെടുത്തിയിട്ടുണ്ട്.