പത്തനംതിട്ട: ഏഴംകുളം അറുകാലിക്കലിൽ നിയമസഭാ തെരഞ്ഞെടുപ്പ് പ്രചാരണത്തിനിടെ സിപിഎം പ്രവർത്തകന് വെട്ടേറ്റു. വീടുകളിൽ സ്ലിപ്പ് വിതരണം ചെയ്യുന്നതിനിടെ അറുകാലിക്കൽ സ്വദേശി രാധാകൃഷ്ണനെ അയൽവാസിയായ അലക്സ് ആക്രമിക്കുകയായിരുന്നു. തലയ്ക്കും കാലിനും ഗുരുതരമായി പരിക്കേറ്റ രാധാകൃഷ്ണനെ ഉടൻ തന്നെ ആശുപത്രിയിൽ പ്രവേശിപ്പിച്ചു. അലക്സ് സജീവ കോൺഗ്രസ് പ്രവർത്തകനാണെന്നും രാഷ്ട്രീയ വിദ്വേഷമാണ് ആക്രമണത്തിന് പിന്നിലെന്നും സിപിഎം നേതൃത്വം ആരോപിച്ചു.
എന്നാൽ, ഈ സംഭവം രാഷ്ട്രീയ വൈരാഗ്യം മൂലമല്ലെന്നും അയൽവാസികൾ തമ്മിലുള്ള വ്യക്തിപരമായ തർക്കമാണ് അക്രമത്തിൽ കലാശിച്ചതെന്നുമാണ് പോലീസിന്റെ പ്രാഥമിക നിഗമനം. അക്രമിയായ അലക്സിനെ പോലീസ് കസ്റ്റഡിയിലെടുത്തിട്ടുണ്ട്. ഇയാൾ ആക്രമണത്തിന് ഉപയോഗിച്ച ആയുധവും പോലീസ് കണ്ടെടുത്തിട്ടുണ്ട്. മറ്റ് നടപടിക്രമങ്ങൾ പൂർത്തിയാക്കിയ ശേഷം പ്രതിയുടെ അറസ്റ്റ് രേഖപ്പെടുത്തി കോടതിയിൽ ഹാജരാക്കും. പരിക്കേറ്റ രാധാകൃഷ്ണന്റെ ആരോഗ്യനില സംബന്ധിച്ച കൂടുതൽ വിവരങ്ങൾ ലഭ്യമായിട്ടില്ല.
