ദില്ലി ചെങ്കോട്ടയ്ക്ക് സമീപമുണ്ടായ ശക്തമായ സ്ഫോടനത്തിൽ കേന്ദ്ര സർക്കാർ എട്ട് പേരുടെ മരണം ഔദ്യോഗികമായി സ്ഥിരീകരിച്ചു. എന്നാൽ അനൗദ്യോഗിക റിപ്പോർട്ടുകൾ പ്രകാരം 13 പേർ മരിച്ചിട്ടുണ്ട്, മരണസംഖ്യ ഇനിയും ഉയരാൻ സാധ്യതയുണ്ട്. 30-ലധികം പേർ പരിക്കേറ്റ് ചികിത്സയിലാണ്. കൊല്ലപ്പെട്ടവരിൽ ഭൂരിഭാഗവും ദില്ലി, യുപി സ്വദേശികളാണ്.
സംഭവത്തിൽ ദില്ലി പോലീസ് ഭീകരവിരുദ്ധ നിയമമായ യുഎപിഎ ചുമത്തി കേസെടുത്തിട്ടുണ്ട്. ഇതൊരു ഭീകരാക്രമണമാണെന്നാണ് സർക്കാർ വൃത്തങ്ങൾ നൽകുന്ന സൂചന. പ്രധാനമന്ത്രി നരേന്ദ്ര മോദി സാഹചര്യം വിലയിരുത്തി.
ചാവേറാക്രമണമെന്ന് സംശയം
ഇന്നലെ വൈകിട്ട് 6:55-ന് ലാൽകില മെട്രോ സ്റ്റേഷന് മുന്നിലെ ട്രാഫിക് സിഗ്നലിൽ എത്തിയ ഹുണ്ടായ് ഐ 20 കാറാണ് പൊട്ടിത്തെറിച്ചത്. ഇതൊരു ചാവേർ ആക്രമണമാണെന്നാണ് സംശയിക്കുന്നത്. സ്ഫോടനത്തിന്റെ ആഘാതത്തിൽ സമീപത്തുണ്ടായിരുന്ന നിരവധി വാഹനങ്ങൾ തകർന്നു. ഒരു വലിയ തീഗോളം ആകാശത്തേക്ക് ഉയർന്നെന്നും ഒരു കിലോമീറ്റർ ദൂരത്തിൽ വരെ പ്രകമ്പനം അനുഭവപ്പെട്ടെന്നും ദൃക്സാക്ഷികൾ പറഞ്ഞു.
ലക്ഷ്യം പിഴച്ചത് ട്രാഫിക് സിഗ്നലിൽ
തിരക്കേറിയ ചാന്ദ്നി ചൗക്ക് മാർക്കറ്റ് ആയിരുന്നു ഭീകരരുടെ ലക്ഷ്യമെന്നാണ് പോലീസിൻ്റെ നിഗമനം. എന്നാൽ, മാർക്കറ്റിന് സമീപത്തേക്കുള്ള വഴിയിൽ ട്രാഫിക് സിഗ്നൽ ലഭിച്ചതിനാൽ കാർ നിർത്തേണ്ടി വന്നത് അവരുടെ പദ്ധതി തടസ്സപ്പെടുത്തി.
സിസിടിവി ദൃശ്യങ്ങൾ നിർണായകം
സ്ഫോടനത്തിന് മുമ്പ്, കറുത്ത മാസ്ക് ധരിച്ച ഒരാൾ ചെങ്കോട്ടയിലെ പാർക്കിംഗിൽ നിന്ന് കാർ ഓടിച്ചു പോകുന്നതിന്റെ സിസിടിവി ദൃശ്യങ്ങൾ ‘ദ ഇന്ത്യൻ എക്സ്പ്രസ്’ പുറത്തുവിട്ടു. കാറിൽ ഡ്രൈവർ മാത്രമാണ് ഉണ്ടായിരുന്നതെന്നാണ് ദൃശ്യങ്ങളിൽ നിന്ന് വ്യക്തമാകുന്നത്. ഇത് ചാവേറാക്രമണ സാധ്യത ബലപ്പെടുത്തുന്നു. കാർ മൂന്ന് മണിക്കൂറോളം ചെങ്കോട്ടയിൽ പാർക്ക് ചെയ്തിരുന്നു. പുൽവാമ സ്വദേശിയായ താരിഖ് എന്നയാളുടെ പേരിലാണ് ഈ കാർ രജിസ്റ്റർ ചെയ്തിട്ടുള്ളതെന്ന് പോലീസ് കണ്ടെത്തിയിട്ടുണ്ട്.
