കൊച്ചി : കൊച്ചിയിലെ കാഴ്ചകൾ സഞ്ചാരികൾക്ക് ആസ്വദിക്കാൻ വേണ്ടി കെ.എസ്.ആർ.ടി.സി ബഡ്ജറ്റ് ടൂറിസം ആരംഭിച്ച കൊച്ചി സിറ്റി റൈഡ് ഡബിൾ ഡക്കർ ബസിന്റെ ട്രിപ്പുകളുടെ എണ്ണം ഒരു ദിവസം മൂന്നായി വർദ്ധിപ്പിച്ചു.പുതിയ സമയക്രമവും നിരക്കുകളുംപുതിയ സമയക്രമം അനുസരിച്ച്, വൈകുന്നേരം 4 മണിക്ക് എറണാകുളം ജെട്ടി സ്റ്റാൻഡിൽ നിന്ന് ആദ്യ ട്രിപ്പ് പുറപ്പെടും. വൈകിട്ട് 6.30-ന് രണ്ടാമത്തെ ട്രിപ്പും, രാത്രി 9 മണിക്ക് മൂന്നാമത്തെ ട്രിപ്പും ആരംഭിക്കും.യാത്രാ നിരക്കുകൾ കുറച്ചിട്ടുണ്ട്. അപ്പർ ഡെക്ക് ചാർജ് 200 രൂപയായും, ലോവർ ഡെക്ക് ചാർജ് 100 രൂപയായും നിശ്ചയിച്ചു.ബസ്സിൽ അപ്പർ ഡെക്കിൽ 39 സീറ്റുകളും, ലോവർ ഡെക്കിൽ 24 സീറ്റുകളുമാണ് ലഭ്യമായിട്ടുള്ളത്.യാത്രാ റൂട്ട്എല്ലാ ദിവസവും ജെട്ടി സ്റ്റാൻഡിൽ നിന്ന് ആരംഭിച്ച് ഗോശ്രീ പാലം കടന്ന് കാളമുക്കിൽ എത്തി, അവിടെ നിന്ന് തിരികെ ഹൈക്കോർട്ട് വഴി എം.ജി. റോഡിലൂടെ ജോസ് ജംഗ്ഷൻ, തേവര, കോപ്റ്റ് അവന്യൂ, ഷിപ്പ്‌യാർഡ്, മഹാരാജാസ് കോളേജ്, സുഭാഷ് പാർക്ക് വഴി തിരികെ ജെട്ടിയിൽ എത്തുന്ന രീതിയിലാണ് ട്രിപ്പ് ക്രമീകരിച്ചിരിക്കുന്നത്.ടിക്കറ്റ് ബുക്കിംഗിനും വിവരങ്ങൾക്കുംകൊച്ചിയിലെ കെ.എസ്.ആർ.ടി.സി ഡബിൾ ഡക്കർ യാത്രയ്ക്കുള്ള ടിക്കറ്റുകൾ onlineksrtcswift.com എന്ന റിസർവേഷൻ വെബ്‌സൈറ്റിൽ ബുക്ക് ചെയ്യാം.റിസർവേഷൻ സൈറ്റിൽ “Starting from” എന്നതിന് പകരം “Kochi City Ride” എന്നും, “Going To” എന്നതിന് പകരം “Kochi” എന്നും നൽകി സീറ്റുകൾ ഉറപ്പിക്കാവുന്നതാണ്.കൂടുതൽ വിവരങ്ങൾ അറിയുന്നതിനായി 9188938528, 8289905075, 9447223212 എന്നീ നമ്പറുകളിൽ ബന്ധപ്പെടാവുന്നതാണ്.
കൊച്ചി സിറ്റി റൈഡ് ഡബിൾ ഡക്കർ ബസ്: ട്രിപ്പുകളുടെ എണ്ണം വർദ്ധിപ്പിച്ചു; നിരക്ക് കുറച്ചു
