കൊച്ചി: യുണൈറ്റഡ് നഴ്സസ് അസോസിയേഷൻ (UNA) ദേശീയ പ്രസിഡന്റ് ജാസ്മിൻ ഷായ്ക്കെതിരെ എൻഫോഴ്സ്മെന്റ് ഡയറക്ടറേറ്റിന്റെ (ED) നിർണ്ണായക നീക്കം. ജാസ്മിൻ ഷായുടെയും ഭാര്യയുടെയും ഉടമസ്ഥതയിലുള്ള 1.44 കോടി രൂപയുടെ സ്വത്തുക്കൾ ഇഡി കണ്ടുകെട്ടി. ഹവാല പണമിടപാടും സംഘടനയുടെ ഫണ്ട് ദുരുപയോഗം ചെയ്തതുമായി ബന്ധപ്പെട്ട കേസിലാണ് ഈ നടപടി.
2017 മുതൽ 2019 വരെയുള്ള കാലയളവിൽ ജാസ്മിൻ ഷാ യുഎൻഎ ദേശീയ പ്രസിഡന്റായിരിക്കെ, സംഘടനയുടെ അംഗത്വ ലെവികളും ഫണ്ടുകളും വൻതോതിൽ ദുരുപയോഗം ചെയ്ത് പണം തട്ടിയെന്നാണ് പ്രധാന ആരോപണം. നഴ്സുമാരിൽ നിന്ന് സമാഹരിച്ച തുക വ്യക്തിപരമായ ആവശ്യങ്ങൾക്കായി വകമാറ്റിയെന്നും ഹവാല ഇടപാടുകൾ നടത്തിയെന്നുമാണ് അന്വേഷണ ഏജൻസികൾ കണ്ടെത്തിയിരിക്കുന്നത്.
നേരത്തെ തൃശൂർ ക്രൈംബ്രാഞ്ച് രജിസ്റ്റർ ചെയ്ത കേസിലെ വിവരങ്ങളുടെ അടിസ്ഥാനത്തിലാണ് ഇഡി ഈ കേസിൽ ഇടപെട്ടത്. ക്രൈംബ്രാഞ്ച് അന്വേഷണത്തിൽ ഫണ്ട് തട്ടിപ്പും സാമ്പത്തിക ക്രമക്കേടുകളും വ്യക്തമായതോടെയാണ് കള്ളപ്പണം വെളുപ്പിക്കൽ നിരോധന നിയമപ്രകാരം (PMLA) ഇഡി നടപടികളിലേക്ക് കടന്നത്. വരും ദിവസങ്ങളിൽ കൂടുതൽ സ്വത്തുക്കൾ കണ്ടുകെട്ടാനുള്ള സാധ്യതയും അന്വേഷണ സംഘം തള്ളിക്കളയുന്നില്ല.
