തിരുവനന്തപുരം: കേരള നിയമസഭാ തെരഞ്ഞെടുപ്പിന്റെ വോട്ടെടുപ്പ് ആവേശകരമായി പുരോഗമിക്കുന്നു. സംസ്ഥാനത്തെ 140 മണ്ഡലങ്ങളിലായി സജ്ജീകരിച്ചിട്ടുള്ള 30,495 ബൂത്തുകളിൽ രാവിലെ ഏഴ് മണിക്ക് തന്നെ വോട്ടിംഗ് ആരംഭിച്ചു. ജനവിധി നിർണ്ണയിക്കുന്ന 2.71 കോടി വോട്ടർമാർക്കായി വൈകുന്നേരം ആറ് മണി വരെയാണ് വോട്ട് രേഖപ്പെടുത്താൻ സമയം അനുവദിച്ചിരിക്കുന്നത്. ആകെ 883 സ്ഥാനാർത്ഥികളാണ് ഈ തെരഞ്ഞെടുപ്പിൽ ജനവിധി തേടുന്നത്. 23 ദിവസം നീണ്ടുനിന്ന വീറും വാശിയും നിറഞ്ഞ പ്രചാരണ പ്രവർത്തനങ്ങൾക്കൊടുവിലാണ് കേരളം ഇന്ന് പോളിംഗ് ബൂത്തിലെത്തുന്നത്.
തെരഞ്ഞെടുപ്പ് സമാധാനപരമായി നടത്തുന്നതിനായി വിപുലമായ സുരക്ഷാ ക്രമീകരണങ്ങളാണ് ഒരുക്കിയിരിക്കുന്നത്. സംസ്ഥാനത്തെ 2500 ബൂത്തുകൾ പ്രശ്നബാധിതമായി കണ്ടെത്തിയിട്ടുള്ളതിനാൽ അവിടെ പ്രത്യേക ജാഗ്രത നിർദ്ദേശം നൽകിയിട്ടുണ്ട്. മൂന്ന് മുന്നണികളെ സംബന്ധിച്ചും ഈ പോരാട്ടം അതീവ നിർണ്ണായകമാണ്. ഇടത് മുന്നണി (LDF) ഭരണത്തുടർച്ച ലക്ഷ്യമിടുമ്പോൾ, പത്ത് വർഷത്തെ ഇടവേളയ്ക്ക് ശേഷം അധികാരം തിരിച്ചുപിടിക്കാമെന്ന പ്രതീക്ഷയിലാണ് യുഡിഎഫ് (UDF). നിയമസഭയിൽ അക്കൗണ്ട് തുറന്ന് തങ്ങളുടെ സാന്നിധ്യം ശക്തമാക്കാനാണ് എൻഡിഎ (NDA) ലക്ഷ്യമിടുന്നത്
