വെടിനിർത്തൽ കരാർ പ്രഖ്യാപിച്ചതിന് പിന്നാലെയും കുവൈത്തിനുമേൽ ശക്തമായ മിസൈൽ-ഡ്രോൺ ആക്രമണം തുടരുന്നു. രാജ്യത്തിന്റെ പ്രധാന അടിസ്ഥാന സൗകര്യങ്ങൾ സംരക്ഷിക്കാൻ നാഷണൽ ഗാർഡ് സേന ഉയർന്ന ജാഗ്രതയിലും പൂർണ്ണ സജ്ജതയിലും തുടരുന്നതായി അധികൃതർ അറിയിച്ചു.
കുവൈത്ത് സിറ്റിയിൽ നടന്ന പുതിയ ആക്രമണത്തിൽ നാഷണൽ ഗാർഡിന്റെ ഒരു സൈറ്റിന് ഗണ്യമായ നാശനഷ്ടമുണ്ടായി. എന്നാൽ ആളപായമൊന്നും റിപ്പോർട്ട് ചെയ്തിട്ടില്ലെന്ന് നാഷണൽ ഗാർഡ് വ്യക്തമാക്കി. സംഭവത്തെ തുടർന്ന് ആവശ്യമായ നടപടികൾ ആരംഭിച്ചതായി ജനറൽ ഡോ. ജദ്ആൻ ഫാദൽ അറിയിച്ചു.
രാജ്യത്തിന്റെ സുരക്ഷ ഉറപ്പാക്കുന്നതിനായി സൈന്യം, പൊലീസ്, ജനറൽ ഫയർ ഫോഴ്സ് എന്നിവയുമായി ചേർന്ന് എല്ലാ ഭീഷണികളെയും നേരിടാൻ സേനകൾ സജ്ജമാണെന്നും അദ്ദേഹം കൂട്ടിച്ചേർത്തു. ഔദ്യോഗിക ഉറവിടങ്ങളിൽ നിന്നുള്ള വിവരങ്ങൾ മാത്രം വിശ്വസിക്കണമെന്നും അഭ്യൂഹങ്ങൾ പ്രചരിപ്പിക്കരുതെന്നും ജനങ്ങളോട് അഭ്യർത്ഥിച്ചു.
ഇതിനിടെ, അമേരിക്കയും ഇറാനും തമ്മിലുള്ള വെടിനിർത്തൽ കരാർ പ്രതിസന്ധിയിലേക്ക് നീങ്ങുന്നതായി റിപ്പോർട്ടുകൾ സൂചിപ്പിക്കുന്നു. പുതിയ ചർച്ചകൾക്ക് തയ്യാറെടുപ്പ് നടക്കുന്നതിനിടെ ഇരുരാജ്യങ്ങളും തമ്മിലുള്ള അഭിപ്രായവ്യത്യാസങ്ങൾ വർധിച്ചിരിക്കുകയാണ്, ഇത് ആഗോള എണ്ണ വിപണിയെയും ബാധിക്കുന്നു.
ഹോർമുസ് കടലിടുക്കിൽ ഇറാൻ കരാർ ലംഘിച്ചതായി അമേരിക്ക ആരോപിക്കുന്നതിനൊപ്പം, ലെബനനിൽ ഇസ്രായേൽ നടത്തിയ ആക്രമണങ്ങളെ വെടിനിർത്തൽ കരാർ ലംഘനമായി ഇറാൻ വിമർശിച്ചു. കൂടാതെ, കരാറിലെ നിബന്ധനകൾ പാലിക്കാത്തതിനെ തുടർന്ന് ഇറാൻ എണ്ണ വിതരണത്തിൽ നിയന്ത്രണം ഏർപ്പെടുത്തിയതും നിലവിലെ സംഘർഷം കൂടുതൽ രൂക്ഷമാക്കുകയാണ്.
മധ്യേഷ്യയിലെ രാഷ്ട്രീയ സംഘർഷങ്ങളും ഉപരോധങ്ങളുമായി ബന്ധപ്പെട്ട തർക്കങ്ങളും കാരണം എണ്ണ കയറ്റുമതിയിൽ ഇടിവ് രേഖപ്പെടുത്തിയിട്ടുണ്ട്. ഇത് വരാനിരിക്കുന്ന ഉയർന്നതല ചർച്ചകൾക്ക് തിരിച്ചടിയായേക്കാമെന്ന് നയതന്ത്ര വിദഗ്ധർ വിലയിരുത്തുന്നു. സമാധാന ശ്രമങ്ങൾ പരാജയപ്പെടുകയാണെങ്കിൽ മേഖലയിൽ വീണ്ടും സംഘർഷസാധ്യത ഉയരുമെന്നും മുന്നറിയിപ്പുണ്ട്.Kuwait hit by fresh missile and drone strikes.
