തിരുവനന്തപുരം: കണ്ണൂർ അഞ്ചരക്കണ്ടി ഡെന്റൽ കോളേജ് വിദ്യാർത്ഥി നിതിൻ രാജിന്റെ മരണത്തിൽ പോലീസ് പ്രത്യേക അന്വേഷണ സംഘം രൂപീകരിച്ചു. കണ്ണൂർ എസിപിയുടെ നേതൃത്വത്തിലുള്ള 13 അംഗ സംഘമാണ് കേസ് അന്വേഷിക്കുന്നത്. കോളേജിലെ അധ്യാപകരിൽ നിന്ന് നിതിൻ നേരിട്ട കടുത്ത ജാതി അധിക്ഷേപങ്ങളെയും മാനസിക പീഡനങ്ങളെയും കുറിച്ച് വീട്ടുകാരും സുഹൃത്തുക്കളും വെളിപ്പെടുത്തിയ സാഹചര്യത്തിലാണ് അന്വേഷണം ഊർജ്ജിതമാക്കാൻ പോലീസ് തീരുമാനിച്ചത്.
നിതിനെ അധ്യാപകർ ഭീഷണിപ്പെടുത്തിയിരുന്നതായി വ്യക്തമാക്കുന്ന നിർണ്ണായകമായ ശബ്ദ സന്ദേശങ്ങൾ ഇതിനിടെ പുറത്തുവന്നു. കോളേജിലെ സ്റ്റാഫ് റൂം പോലും നിതിനെ മാനസികമായി തകർക്കാനുള്ള ഇടമായി മാറിയെന്നും, ഗേറ്റിന് പുറത്തിറങ്ങിയാൽ കൈകാലുകൾ വെട്ടിക്കളയുമെന്ന് അധ്യാപകർ ഭീഷണിപ്പെടുത്തിയതായും ശബ്ദരേഖയിൽ പറയുന്നു. കുടുംബത്തിന്റെ ആരോപണങ്ങൾ ശരിവെക്കുന്ന തരത്തിലുള്ള ഈ തെളിവുകൾ കേസിൽ നിർണ്ണായകമാകും.
പ്രതിപക്ഷ നേതാവ് വി.ഡി. സതീശൻ, സി.പി.എം സംസ്ഥാന സെക്രട്ടറി എം.വി. ഗോവിന്ദൻ എന്നിവർ നിതിന്റെ വീട് സന്ദർശിച്ച് കുടുംബത്തെ ആശ്വസിപ്പിച്ചു. പൂക്കോട് വെറ്ററിനറി കോളേജിൽ റാഗിംഗിനെത്തുടർന്ന് മരിച്ച സിദ്ധാർത്ഥിന്റെ അമ്മയും നിതിന്റെ വീട്ടിലെത്തിയിരുന്നു. സംഭവത്തിൽ നിഷ്പക്ഷവും വിശദവുമായ അന്വേഷണം വേണമെന്ന് വി.ഡി. സതീശനും എം.വി. ഗോവിന്ദനും സർക്കാരിനോട് ആവശ്യപ്പെട്ടു.
