ക്രൈസ്തവ ലോകം ഇന്ന് യേശുക്രിസ്തുവിന്റെ ജെറുസലേം പ്രവേശനത്തിന്റെ സ്മരണ പുതുക്കി ഓശാന ഞായർ ആചരിക്കുന്നു. ഇതോടെ ക്രൈസ്തവ വിശ്വാസികളെ സംബന്ധിച്ചിടത്തോളം ഏറ്റവും പ്രധാനപ്പെട്ട ‘വിശുദ്ധ വാരത്തിന്’ തുടക്കമാവുകയാണ്. സംസ്ഥാനത്തെ വിവിധ ദേവാലയങ്ങളിൽ കുരുത്തോല പെരുന്നാളിന്റെ ഭാഗമായുള്ള പ്രത്യേക പ്രാർത്ഥനാ ചടങ്ങുകളും വിശുദ്ധ കുർബാനയും ആരംഭിച്ചുകഴിഞ്ഞു.
സീറോ മലബാർ സഭ മേജർ ആർച്ച് ബിഷപ്പ് മാർ റാഫേൽ തട്ടിൽ എറണാകുളം സെന്റ് മേരീസ് ബസലിക്കയിലെ ചടങ്ങുകൾക്ക് നേതൃത്വം നൽകും. വരാപ്പുഴ അതിരൂപത ആർച്ച് ബിഷപ്പ് ഡോ. ജോസഫ് കളത്തിപ്പറമ്പിൽ എറണാകുളം സെന്റ് ഫ്രാൻസിസ് കത്തീഡ്രലിൽ ശുശ്രൂഷകൾക്ക് കാർമികത്വം വഹിക്കും. യേശുവിനെ ഒലിവ് മരച്ചില്ലകൾ വീശി ജെറുസലേം നിവാസികൾ സ്വീകരിച്ചതിന്റെ ഓർമ്മയ്ക്കായി വിശ്വാസികൾ കുരുത്തോലകൾ ഏന്തി പ്രദക്ഷിണത്തിൽ പങ്കുചേരുന്നു.
വിവിധ പള്ളികളിൽ കുരുത്തോല വെഞ്ചരിപ്പ്, പ്രദക്ഷിണം, വിശുദ്ധ കുർബാന, വചന സന്ദേശം എന്നിവ ഓശാന ഞായർ ശുശ്രൂഷകളുടെ ഭാഗമായി നടക്കുന്നുണ്ട്. ദുഃഖവെള്ളി വരെയുള്ള പീഡാനുഭവ വാരത്തിലെ ചടങ്ങുകളിലേക്ക് ഈ ദിനം വിശ്വാസികളെ നയിക്കുന്നു. കേരളത്തിലുടനീളമുള്ള ദേവാലയങ്ങളിൽ വലിയ ഭക്തിനിർഭരമായ ചടങ്ങുകളാണ് പുരോഗമിക്കുന്നത്.
