കണ്ണൂർ അഞ്ചരക്കണ്ടി ഡെന്റൽ കോളേജിലെ ഒന്നാം വർഷ വിദ്യാർത്ഥി നിതിൻ രാജിന്റെ മരണത്തിൽ കോളേജ് അധികൃതർക്കെതിരെ ഗുരുതര ആരോപണങ്ങളുമായി കുടുംബം രംഗത്തെത്തി. ഡെന്റൽ അനാട്ടമി വിഭാഗം മേധാവിയും മറ്റ് അധ്യാപകരും നിതിനെ ക്രൂരമായി മാനസികമായി പീഡിപ്പിച്ചിരുന്നതായി കുടുംബം ആരോപിക്കുന്നു. നിതിന്റെ ജാതിയെയും കുടുംബത്തിന്റെ സാമ്പത്തിക ചുറ്റുപാടിനെയും പരിഹസിച്ചുകൊണ്ടുള്ള അധിക്ഷേപങ്ങൾ പതിവായിരുന്നുവെന്നും, എച്ച്.ഒ.ഡിക്ക് (HOD) എതിരെ പരാതി നൽകിയതിലുള്ള വൈരാഗ്യം അധികൃതർ തീർത്തതായും ബന്ധുക്കൾ പറയുന്നു.
കൂടാതെ, കോളേജിലെ സീനിയർ വിദ്യാർത്ഥികളിൽ നിന്ന് നിതിൻ കടുത്ത റാഗിങ്ങിന് ഇരയായിട്ടുണ്ടെന്നും കുടുംബം വെളിപ്പെടുത്തി. നിതിൻ ഒരിക്കലും ആത്മഹത്യ ചെയ്യില്ലെന്ന് ഉറപ്പിച്ചു പറയുന്ന കുടുംബം, മരണത്തിൽ ദുരൂഹതയുണ്ടെന്ന് ആവർത്തിക്കുന്നു. അവധിക്ക് നാട്ടിലേക്ക് വരാനിരിക്കെയാണ് നിതിനെ കോളേജ് കെട്ടിടത്തിൽ നിന്ന് വീണ നിലയിൽ കണ്ടെത്തിയത്. ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
തിരുവനന്തപുരം ഉഴമലയ്ക്കൽ സ്വദേശിയായ നിതിൻ രാജ്, പെയിന്റിംഗ് തൊഴിലാളിയായ രാജന്റെയും ലതയുടെയും മകനാണ്. പഠനത്തിൽ മികവ് പുലർത്തിയിരുന്ന നിതിൻ മെറിറ്റ് സീറ്റിലാണ് ഇത്തവണ അഞ്ചരക്കണ്ടി ഡെന്റൽ കോളേജിൽ പ്രവേശനം നേടിയത്. ഒരു സാധാരണ കുടുംബത്തിന്റെ പ്രതീക്ഷയായിരുന്ന വിദ്യാർത്ഥിയുടെ വിയോഗം വലിയ പ്രതിഷേധങ്ങൾക്കും ചർച്ചകൾക്കും വഴിതുറന്നിരിക്കുകയാണ്.
