കൊല്ലം: കാസർകോട്-തിരുവനന്തപുരം വന്ദേഭാരത് ട്രെയിനിന് നേരെ കല്ലെറിഞ്ഞ കേസിൽ ഒരാളെ റെയിൽവേ സംരക്ഷണ സേന (RPF) അറസ്റ്റ് ചെയ്തു. പ്രാക്കുളം പണ്ടാരഴികത്ത് സുനിൽ (38) ആണ് പിടിയിലായത്. കഴിഞ്ഞ നവംബർ അഞ്ചിന് രാത്രി, കൊല്ലം റെയിൽവേ സ്റ്റേഷൻ പിന്നിട്ട് ചിന്നക്കട റെയിൽവേ ഓവർബ്രിഡ്‌ജിന് സമീപം ട്രെയിൻ എത്തിയപ്പോഴാണ് സി-വൺ കോച്ചിന്റെ ചില്ല് തകർത്ത് കല്ലേറുണ്ടായത്. സംഭവത്തെ തുടർന്ന് ആർപിഎഫും ഇന്റലിജൻസ് വിഭാഗവും ഉടൻ അന്വേഷണം ആരംഭിക്കുകയും, നവംബർ ഏഴിന് രാവിലെ സംശയാസ്‌പദമായി കണ്ടയാളെ കസ്റ്റഡിയിലെടുത്ത് ചോദ്യം ചെയ്തപ്പോൾ കുറ്റം സമ്മതിക്കുകയും ചെയ്തു. ട്രെയിനിലെ ക്യാമറയിലെ സമയവും പ്രതിയുടെ മൊബൈൽ ലൊക്കേഷനും പരിശോധിച്ചാണ് കേസിൽ നിർണ്ണായക തെളിവുകൾ കണ്ടെത്തിയത്. റെയിൽവേ നിയമം-153 പ്രകാരം കേസെടുത്ത പ്രതിയെ കോടതിയിൽ ഹാജരാക്കി റിമാൻഡ് ചെയ്തു. ആർപിഎഫ് ഇൻസ്പെക്‌ടർ ടി.ആർ. അനീഷിന്റെയും തിരുവനന്തപുരം ആർപിഎഫ് ക്രൈം ഇന്റലിജൻസ് ബ്രാഞ്ച് എസ്ഐ പ്രെയ്‌സ് മാത്യുവിന്റെയും നേതൃത്വത്തിലുള്ള സംഘമാണ് പ്രതിയെ പിടികൂടിയത്.
വന്ദേഭാരത് കല്ലേറ്: പ്രതി കൊല്ലത്ത് പിടിയിൽ
