തിരുവനന്തപുരം: ദേശീയ മെഡിക്കൽ കമ്മീഷൻ്റെ (NMC) നിർദ്ദേശപ്രകാരം എംബിബിഎസ് കോഴ്സിന് അധികമായി ഈടാക്കിയ ആറുമാസത്തെ ഫീസ് വിദ്യാർത്ഥികൾക്ക് തിരികെ നൽകുന്നതുമായി ബന്ധപ്പെട്ട് സംസ്ഥാന സർക്കാർ അടിയന്തര യോഗം വിളിച്ചു. ആരോഗ്യമന്ത്രി കെ. മുരളീധരൻ്റെ അധ്യക്ഷതയിൽ വെള്ളിയാഴ്ച ചേരുന്ന ഈ യോഗത്തിൽ മെഡിക്കൽ വിദ്യാഭ്യാസ ഡയറക്ടറും സ്വാശ്രയ കോളേജ് മാനേജ്മെന്റ് പ്രതിനിധികളും പങ്കെടുക്കും.
2024-ലെ ഗ്രാജ്വേറ്റ് മെഡിക്കൽ എജുക്കേഷൻ ചട്ടപ്രകാരം എംബിബിഎസ് കോഴ്സിന്റെ യഥാർത്ഥ കാലയളവ് നാലര വർഷമാണ് (54 മാസം). എന്നാൽ സംസ്ഥാനത്തെ സ്വാശ്രയ കോളേജുകൾ അഞ്ചുവർഷത്തെ ഫീസ് വാങ്ങുന്നതിനെതിരെയാണ് ദേശീയ മെഡിക്കൽ കമ്മീഷൻ്റെ നടപടി. യഥാർത്ഥ കോഴ്സ് കാലയളവിനുള്ള ഫീസ് മാത്രമേ ഈടാക്കാവൂ എന്ന് മൂന്നര മാസം മുമ്പ് എൻഎംസി സർക്കുലർ ഇറക്കിയിരുന്നെങ്കിലും കേരളം ഇത് നടപ്പാക്കിയിരുന്നില്ല. ഇതിനെത്തുടർന്നാണ് അധികം വാങ്ങിയ ആറുമാസത്തെ ഫീസ് തിരികെ നൽകാൻ കമ്മീഷൻ വീണ്ടും കർശന നിർദ്ദേശം നൽകിയത്.
കേരളത്തിലെ സ്വാശ്രയ കോളേജുകളിൽ ഫീസ് നിർണയ സമിതിയാണ് വരവുചെലവ് കണക്കുകൾ പരിശോധിച്ച് ഓരോ വർഷത്തെയും ഫീസ് നിശ്ചയിക്കുന്നത്. ആദ്യവർഷം നിശ്ചയിക്കുന്ന ഫീസ് തുടർന്നുള്ള വർഷങ്ങളിലും ബാധകമാക്കുന്ന രീതിയാണ് ഇവിടെയുള്ളത്. ഇതിൻ്റെ അടിസ്ഥാനത്തിൽ സർക്കാർ പുറപ്പെടുവിക്കുന്ന ഉത്തരവുകളിലും അഞ്ച് വർഷത്തെ ഫീസ് എന്നാണ് രേഖപ്പെടുത്താറുള്ളത്. ഈ സാഹചര്യത്തിൽ എൻഎംസിയുടെ പുതിയ നിർദ്ദേശം കേരളത്തിന് ബാധകമല്ലെന്നാണ് സ്വകാര്യ മെഡിക്കൽ കോളേജ് മാനേജ്മെന്റുകളുടെ വാദം.
നിലവിലെ ഫീസ് ഘടനയനുസരിച്ച് സംസ്ഥാനത്തെ സ്വാശ്രയ മെഡിക്കൽ വിദ്യാർത്ഥികൾ ആറുമാസത്തേക്ക് അധികമായി മൂന്നര ലക്ഷം മുതൽ ആറ് ലക്ഷം രൂപ വരെ നൽകേണ്ടി വരുന്നുണ്ട്. മാനേജ്മെന്റുകൾ തങ്ങളുടെ നിലപാടിൽ ഉറച്ചുനിൽക്കുമ്പോഴും, പുതിയ സാഹചര്യത്തിൽ അനുകൂലമായ സർക്കാർ ഇടപെടലുണ്ടാകുമെന്ന വലിയ പ്രതീക്ഷയിലാണ് വിദ്യാർത്ഥികളും രക്ഷിതാക്കളും.
