തിരുവനന്തപുരം: ഇന്ത്യൻ നിർമിത എസ്.എം.എ. (SMA) മരുന്ന് വിൽപ്പനയുമായി ബന്ധപ്പെട്ട് പ്രതിപക്ഷം ഉന്നയിച്ച ആരോപണങ്ങൾ തള്ളിക്കൊണ്ട് മുഖ്യമന്ത്രി നിയമസഭയിൽ ആരോഗ്യ വകുപ്പിനെ പ്രശംസിച്ചു. പാവപ്പെട്ട കുട്ടികൾക്ക് കുറഞ്ഞ വിലയിൽ മരുന്ന് ലഭ്യമാക്കിയതിൽ എന്താണ് തെറ്റെന്ന് മുഖ്യമന്ത്രി ചോദിച്ചു. 12 ദിവസത്തെ ഉപയോഗത്തിനായുള്ള, ആറര ലക്ഷം രൂപ വിലവരുന്ന മരുന്ന് 15,000 രൂപയായി കുറച്ചു നൽകിയതാണോ പ്രതിപക്ഷത്തിന്റെ പ്രശ്നമെന്ന് ആരായുകയും, ഈ വിഷയത്തിൽ ആരോഗ്യ മന്ത്രിയെയും വകുപ്പിനെയും അദ്ദേഹം അഭിനന്ദിക്കുകയും ചെയ്തു.
അതേസമയം, കഴിഞ്ഞ സർക്കാരിന്റെ കാലത്ത് മരുന്ന് വാങ്ങിയ ഇനത്തിൽ ഇനിയും 50 കോടി രൂപ നൽകാൻ ബാക്കിയുണ്ടെന്ന് ആരോഗ്യമന്ത്രി സഭയെ അറിയിച്ചു. എന്നിരുന്നാലും എസ്.എം.എ. മരുന്നുകൾ കുറഞ്ഞ വിലയിൽ തന്നെ ജനങ്ങൾക്ക് നൽകുന്നത് തുടരുമെന്നും മന്ത്രി വ്യക്തമാക്കി.
