റഷ്യ-യുക്രൈൻ യുദ്ധത്തിൽ റഷ്യൻ സേനയുടെ ഭാഗമായി പങ്കെടുത്ത പത്ത് ഇന്ത്യൻ പൗരന്മാർ കൊല്ലപ്പെട്ടതായി കേന്ദ്ര സർക്കാർ സുപ്രീം കോടതിയെ അറിയിച്ചു. റഷ്യയിലുള്ള തങ്ങളുടെ ബന്ധുക്കളെ സുരക്ഷിതമായി നാട്ടിലെത്തിക്കണമെന്ന് ആവശ്യപ്പെട്ട് വിവിധ കുടുംബങ്ങൾ സമർപ്പിച്ച ഹർജി പരിഗണിക്കവെയാണ് സർക്കാർ ഈ ഔദ്യോഗിക വിവരം കോടതിക്ക് കൈമാറിയത്.
കൊല്ലപ്പെട്ടവരിൽ ഭൂരിഭാഗം പേരും സ്വന്തം ഇഷ്ടപ്രകാരം റഷ്യൻ സേനയുമായി കരാറിൽ ഏർപ്പെട്ടവരാണെന്നാണ് കേന്ദ്രത്തിന്റെ വിശദീകരണം. തുടക്കത്തിൽ റഷ്യൻ സൈന്യത്തിൽ സഹായികളായും മറ്റും ജോലിയിൽ പ്രവേശിച്ച ഇവർ, പിന്നീട് യുദ്ധം കടുത്തതോടെ പോരാട്ടഭൂമിയിൽ എത്തപ്പെടുകയായിരുന്നുവെന്നും സർക്കാർ കോടതിയിൽ വ്യക്തമാക്കി.
നിലവിൽ യുദ്ധമേഖലയിൽ കുടുങ്ങിക്കിടക്കുന്ന മറ്റ് ഇന്ത്യക്കാരെ സുരക്ഷിതമായി തിരികെ എത്തിക്കുന്നതിനായുള്ള നയതന്ത്ര ചർച്ചകൾ റഷ്യയുമായി തുടരുകയാണെന്നും സർക്കാർ ബോധിപ്പിച്ചു. 2022 ഫെബ്രുവരിയിൽ ആരംഭിച്ച റഷ്യ-യുക്രെയ്ൻ യുദ്ധം ഇപ്പോഴും അതീവ ഗുരുതരമായി തുടരുന്ന പശ്ചാത്തലത്തിലാണ് ഈ നീക്കങ്ങൾ നടക്കുന്നത്.
