കൊച്ചി: പ്രതിപക്ഷ നേതാവ് വി.ഡി. സതീശൻ പറവൂർ മണ്ഡലത്തിൽ വീണ്ടും ജനവിധി തേടുന്നതിനായി നാമനിർദ്ദേശ പത്രിക സമർപ്പിച്ചു. പറവൂരിലെ കോൺഗ്രസ് ഓഫീസായ രാജീവ് ഭവനിൽ നിന്നും പ്രവർത്തകരുടെയും നേതാക്കളുടെയും വലിയൊരു നിരയ്ക്കൊപ്പം കാൽനടയായാണ് അദ്ദേഹം അഡീഷണൽ തഹസിൽദാർ ഓഫീസിലെത്തിയത്. ആവേശഭരിതമായ മുദ്രാവാക്യം വിളികളോടെ പ്രവർത്തകർ ഈ പത്രികാ സമർപ്പണം ഒരു ആഘോഷമാക്കി മാറ്റി. ആകെ രണ്ട് സെറ്റ് പത്രികകളാണ് അദ്ദേഹം സമർപ്പിച്ചത്.
പ്ലാച്ചിമട സമര സമിതി നൽകിയ തുകയാണ് വി.ഡി. സതീശൻ തിരഞ്ഞെടുപ്പിൽ കെട്ടിവെക്കാനായി ഉപയോഗിച്ചത് എന്നത് ശ്രദ്ധേയമായി. യുഡിഎഫ് അധികാരത്തിൽ വന്നാൽ പ്ലാച്ചിമടയിലെ പ്രശ്നങ്ങൾക്ക് ശാശ്വത പരിഹാരം കാണുമെന്ന് അദ്ദേഹം പത്രികാ സമർപ്പണത്തിന് മുന്നോടിയായി ഉറപ്പുനൽകി. പ്ലാച്ചിമടയിലെ പാവപ്പെട്ടവർ നൽകിയ ഈ സ്നേഹവും പിന്തുണയും ഹൃദയപൂർവ്വം ഏറ്റുവാങ്ങുന്നുവെന്നും അദ്ദേഹം കൂട്ടിച്ചേർത്തു. പത്രിക സമർപ്പിക്കാനുള്ള അവസാന ദിവസമായ ഇന്ന് അദ്ദേഹത്തെ കൂടാതെ നിരവധി പ്രമുഖ സ്ഥാനാർത്ഥികളും പത്രികകൾ സമർപ്പിച്ചു.
