ചെന്നൈ: തമിഴ്നാട് മുഖ്യമന്ത്രിയായി വിജയ് അധികാരമേറ്റ സത്യപ്രതിജ്ഞാ ചടങ്ങിൽ വന്ദേമാതരം ആലപിച്ചത് പുതിയ രാഷ്ട്രീയ ചർച്ചകൾക്ക് തുടക്കമിട്ടു. കേന്ദ്ര ആഭ്യന്തര മന്ത്രാലയത്തിന്റെ ഏറ്റവും പുതിയ നിർദ്ദേശപ്രകാരം, ദേശീയ ഗാനത്തിന് മുന്നോടിയായി വന്ദേമാതരത്തിന്റെ ആറ് ഖണ്ഡികകളും ചടങ്ങിൽ പൂർണ്ണമായി ആലപിച്ചു. ഇതോടെ ദേശീയതയുടെ കാര്യത്തിൽ ബിജെപിയെക്കാൾ ഒരു പടി മുന്നിലാണ് താനെന്ന് വിജയ് തെളിയിച്ചതായി രാഷ്ട്രീയ നിരീക്ഷകർ വിലയിരുത്തുന്നു. 1950-ൽ ഭരണഘടനാ അസംബ്ലി അംഗീകരിച്ച രണ്ട് ഖണ്ഡികകൾ മാത്രം ആലപിക്കുന്ന പതിവ് രീതിയിൽ നിന്നുള്ള ശ്രദ്ധേയമായ മാറ്റമാണ് വിജയ് സർക്കാർ നടപ്പിലാക്കിയത്.
വന്ദേമാതരത്തിന്റെ മുഴുവൻ ഭാഗങ്ങളും ആലപിക്കുന്നതിനെ എതിർക്കുന്ന നിലപാട് സ്വീകരിച്ചിട്ടുള്ള കോൺഗ്രസ് നേതാവ് രാഹുൽ ഗാന്ധിയുടെ സാന്നിധ്യത്തിലായിരുന്നു ഈ ഗാനാലാപനം നടന്നത് എന്നത് രാഷ്ട്രീയമായി ഏറെ പ്രാധാന്യമർഹിക്കുന്നു. ജനുവരി 28-ലെ കേന്ദ്ര ഉത്തരവ് വിജയ് സർക്കാർ കൃത്യമായി പാലിച്ചപ്പോൾ, കഴിഞ്ഞ ശനിയാഴ്ച കൊൽക്കത്തയിൽ നടന്ന ബിജെപി നേതാവ് സുവേന്ദു അധികാരിയുടെ സത്യപ്രതിജ്ഞാ ചടങ്ങിൽ വന്ദേമാതരം ആലപിച്ചിരുന്നില്ല എന്നതും ശ്രദ്ധേയമാണ്. വന്ദേമാതരം പൂർണ്ണരൂപത്തിൽ ആലപിക്കണമെന്ന കേന്ദ്രനിർദ്ദേശം നടപ്പിലാക്കുന്നതിലൂടെ തന്റെ രാഷ്ട്രീയ നിലപാടുകളിൽ വിജയ് വ്യക്തത വരുത്തിയിരിക്കുകയാണ്.
