ബലാത്സംഗ കേസിൽ തിരുവനന്തപുരം ജില്ലാ കോടതിയിൽ രാഹുൽ മാങ്കൂട്ടത്തിൽ മുൻകൂർ ജാമ്യ ഹർജി നൽകി. യുവതിയുമായി തനിക്ക് ദീർഘകാലമായി സൗഹൃദബന്ധമുണ്ടായിരുന്നുവെന്നും, എന്നാൽ പീഡിപ്പിക്കുകയോ ഗർഭഛിദ്രത്തിന് നിർബന്ധിക്കുകയോ ചെയ്തിട്ടില്ലെന്നും ഹർജിയിൽ രാഹുൽ മാങ്കൂട്ടത്തിൽ നിഷേധിക്കുന്നു. റൂറൽ മേഖലയിൽ രജിസ്റ്റർ ചെയ്ത എഫ്‌ഐആർ, കുറ്റകൃത്യം നടന്ന സിറ്റി പരിധിയിലുള്ള നേമം സ്റ്റേഷനിലേക്ക് കൈമാറിയ സാഹചര്യത്തിൽ, തിരുവനന്തപുരം സിറ്റി പൊലീസ് കമ്മീഷണർ തോംസൺ ജോസിന്റെ നേതൃത്വത്തിൽ ഡിസിപിയും അസിസ്റ്റന്റ് കമ്മീഷണറും ഉൾപ്പെടുന്ന പ്രത്യേക അന്വേഷണ സംഘം കേസ് അന്വേഷിക്കാൻ തീരുമാനിച്ചു. ക്രമസമാധാന ചുമതലയുള്ള എഡിജിപി ആയിരിക്കും ഉത്തരവ് പുറത്തിറക്കുക; ഉത്തരവ് വൈകുന്നേരം ഇറങ്ങുമെന്നാണ് വിവരം.
ബലാത്സംഗക്കേസ്: രാഹുൽ മാങ്കൂട്ടത്തിൽ മുൻകൂർ ജാമ്യം തേടി; അന്വേഷണത്തിന് പ്രത്യേക സംഘം
