തിരുവനന്തപുരം: അനധികൃത സ്വത്ത് സമ്പാദന കേസിൽ മുൻ മന്ത്രി വി.എസ്. ശിവകുമാറിന് ക്ലീൻ ചിറ്റ് നൽകിക്കൊണ്ടുള്ള വിജിലൻസ് റിപ്പോർട്ട് കോടതി ഇന്ന് പരിഗണിക്കും. ഉമ്മൻചാണ്ടി സർക്കാരിൽ ആരോഗ്യമന്ത്രിയായിരുന്ന കാലയളവിൽ (2011-2016) ശിവകുമാർ നേരിട്ടും ബിനാമികൾ വഴിയും വരവിൽ കവിഞ്ഞ സ്വത്ത് സമ്പാദിച്ചെന്നാരോപിച്ചാണ് വിജിലൻസ് തിരുവനന്തപുരം റെയ്ഞ്ച് അന്വേഷണം നടത്തിയത്. ശിവകുമാറിനെ ഒന്നാം പ്രതിയാക്കിയാണ് കേസ് രജിസ്റ്റർ ചെയ്തിരുന്നതെങ്കിലും, അദ്ദേഹം മന്ത്രിയായിരുന്നപ്പോൾ ലഭിച്ച വരുമാനത്തിനനുസരിച്ചുള്ള സ്വത്ത് മാത്രമേ നിലവിലുള്ളൂ എന്നാണ് പുതിയ റിപ്പോർട്ടിലെ കണ്ടെത്തൽ.
എന്നാൽ, ഒന്നാം പ്രതിയായ ശിവകുമാറിനെ കേസിൽ നിന്ന് ഒഴിവാക്കുമ്പോഴും കൂട്ടുപ്രതികളായ മറ്റുള്ളവർക്ക് വിജിലൻസ് ക്ലീൻ ചിറ്റ് നൽകിയിട്ടില്ല. ശിവകുമാറിന്റെ ഡ്രൈവറായിരുന്ന ഷൈജു ഹരൻ, അടുത്ത സുഹൃത്തുക്കളായ രാജേന്ദ്രൻ, അഡ്വ. ഹരികുമാർ എന്നിവർക്ക് ഈ കാലയളവിൽ അവിഹിതമായി സ്വത്തുണ്ടായെന്ന് അന്വേഷണത്തിൽ വ്യക്തമായിട്ടുണ്ട്. ശിവകുമാറിന് അനധികൃത സമ്പാദ്യമില്ലെന്നും ഡ്രൈവർ ഉൾപ്പെടെയുള്ളവർ വഴിവിട്ട രീതിയിൽ സ്വത്ത് വർദ്ധിപ്പിച്ചെന്നുമാണ് വിജിലൻസിന്റെ നിലപാട്.
വിജിലൻസ് സമർപ്പിച്ച ഈ നിർണ്ണായക റിപ്പോർട്ട് കോടതി അംഗീകരിക്കുമോ അതോ കൂടുതൽ അന്വേഷണത്തിന് ഉത്തരവിടുമോ എന്നതിലാണ് ഇപ്പോൾ രാഷ്ട്രീയ കേന്ദ്രങ്ങൾ ഉറ്റുനോക്കുന്നത്. അന്വേഷണ ഉദ്യോഗസ്ഥന്റെ കണ്ടെത്തലുകളിൽ കോടതി സ്വീകരിക്കുന്ന നിലപാട് മുൻ മന്ത്രിക്കും മറ്റ് പ്രതികൾക്കും ഒരുപോലെ നിർണ്ണായകമാകും.
