കണ്ണൂർ അഞ്ചരക്കണ്ടി ഡെന്റൽ കോളേജ് വിദ്യാർത്ഥി നിതിൻ രാജിന്റെ ആത്മഹത്യയുമായി ബന്ധപ്പെട്ട അന്വേഷണം സംസ്ഥാന ക്രൈംബ്രാഞ്ചിന് വിട്ടു. കണ്ണൂർ സിറ്റി പോലീസ് കമ്മീഷണറുടെ ശുപാർശ അംഗീകരിച്ച് ഡിജിപിയാണ് ഇതുസംബന്ധിച്ച ഉത്തരവ് പുറപ്പെടുവിച്ചത്. നിതിന്റെ കുടുംബം ഉന്നയിച്ച മാനസിക പീഡന പരാതിയും, മരണത്തിന് പിന്നിലെന്ന് സംശയിക്കുന്ന ലോൺ ആപ്പ് തട്ടിപ്പ് കേസുകളും ഇനി ക്രൈംബ്രാഞ്ച് സംഘമാകും അന്വേഷിക്കുക.
കഴിഞ്ഞ ഏപ്രിൽ പത്തിനാണ് നിതിൻ രാജ് കോളേജ് കെട്ടിടത്തിൽ നിന്നും ചാടി ജീവനൊടുക്കിയത്. കോളേജിലെ വകുപ്പ് മേധാവി ഡോ. എം.കെ. റാം തന്നെ നിരന്തരം മാനസികമായി പീഡിപ്പിക്കുന്നുണ്ടെന്ന് നിതിൻ നേരത്തെ വെളിപ്പെടുത്തിയിരുന്നതായി കുടുംബം ആരോപിക്കുന്നു. സംഭവത്തിന് പിന്നാലെ അധ്യാപകരായ ഡോ. എം.കെ. റാം, ഡോ. സംഗീത നമ്പ്യാർ എന്നിവരെ കേസിൽ പ്രതികളാക്കിയിരുന്നു. ഇരുവരെയും നേരത്തെ സസ്പെൻഡ് ചെയ്തിരുന്നെങ്കിലും, കഴിഞ്ഞ ദിവസം ഡോ. റാമിനെ മാനേജ്മെന്റ് ഔദ്യോഗികമായി പുറത്താക്കി.
അതേസമയം, നിതിൻ രാജിനെയും അധ്യാപികയെയും ഭീഷണിപ്പെടുത്തിയ ലോൺ ആപ്പ് സംഘത്തെ സൈബർ പോലീസ് പിടികൂടി. ഉത്തർപ്രദേശ് സ്വദേശികളായ ഋഷികേഷ് തിവാരി, പ്രശാന്ത് ഖേവൽ, ഫരിദാബാദ് സ്വദേശി പ്രകാശ് ജയ് എന്നിവരാണ് അറസ്റ്റിലായത്. നോയിഡയിലെ ‘ഇൻസ്റ്റന്റ് ഫണ്ട്’ എന്ന സ്ഥാപനത്തിൽ പോലീസ് നടത്തിയ പരിശോധനയിൽ തട്ടിപ്പിന് ഉപയോഗിച്ച സിം ബോക്സുകളും സിം കാർഡുകളും കസ്റ്റഡിയിലെടുത്തിട്ടുണ്ട്. വിദ്യാർത്ഥിയുടെ മരണം കോളേജ് അധികൃതരുടെ പീഡനവും ലോൺ ആപ്പ് സംഘത്തിന്റെ ഭീഷണിയും മൂലമാണോ എന്ന കാര്യത്തിൽ ക്രൈംബ്രാഞ്ച് വിശദമായ അന്വേഷണം നടത്തും.
