തിരുവനന്തപുരം: സി.എം.ആർ.എൽ – എക്സാലോജിക് സാമ്പത്തിക ഇടപാട് (മാസപ്പടി) കേസിൽ സംസ്ഥാനത്ത് എൻഫോഴ്സ്മെന്റ് ഡയറക്ടറേറ്റിന്റെ (ഇ.ഡി) വ്യാപക റെയ്ഡ്. മുൻ മുഖ്യമന്ത്രി പിണറായി വിജയന്റെ വീടുകളിലും കരിമണൽ കമ്പനിയായ സി.എം.ആർ.എല്ലിന്റെ ഓഫീസുകളിലും ഉൾപ്പെടെ ഒരേസമയം 12 ഇടങ്ങളിലാണ് ഇ.ഡി ഉദ്യോഗസ്ഥർ പരിശോധന നടത്തുന്നത്. പിണറായി വിജയന്റെ തിരുവനന്തപുരത്തെ വാടക വീട്, കണ്ണൂരിലെ പിണറായിയിലുള്ള വീട് എന്നിവിടങ്ങളിൽ ഇ.ഡി സംഘം പരിശോധന നടത്തുന്നുണ്ട്. ഇതിന് പുറമെ സി.എം.ആർ.എൽ എം.ഡി ശശിധരൻ കർത്തയുടെ വീട്ടിലും, മുൻ മന്ത്രി മുഹമ്മദ് റിയാസിന്റെ കോഴിക്കോട്ടെ വീട്ടിലും റെയ്ഡ് നടക്കുന്നതായാണ് വിവരം.
കേസിൽ ഇ.ഡിക്ക് അന്വേഷണവുമായി മുന്നോട്ട് പോകാമെന്ന കേരള ഹൈക്കോടതിയുടെ ശക്തമായ ഉത്തരവ് വന്ന് തൊട്ടടുത്ത ദിവസമാണ് ഈ നിർണ്ണായക നീക്കം. മാസപ്പടി കേസിൽ ഇ.ഡി അന്വേഷണം തടയണമെന്ന് ആവശ്യപ്പെട്ട് സി.എം.ആർ.എൽ എം.ഡി ശശിധരൻ കർത്ത, കമ്പനി ചീഫ് ഫിനാൻഷ്യൽ ഓഫീസർ കെ.എസ് സുരേഷ് കുമാർ, ജീവനക്കാരായ അഞ്ജു റേച്ചൽ, ചന്ദ്രശേഖരൻ എന്നിവർ നൽകിയ ഹർജികൾ ഹൈക്കോടതി സിംഗിൾ ബെഞ്ച് ഇന്നലെ തള്ളിയിരുന്നു. വിഴിക്കെതിരെ മേൽകോടതിയെ സമീപിക്കാൻ ഒരാഴ്ചത്തെ സമയം വേണമെന്ന കമ്പനിയുടെ ആവശ്യവും കോടതി അംഗീകരിച്ചിരുന്നില്ല.
പിണറായി വിജയന്റെ മകൾ വീണ വിജയന്റെ ഉടമസ്ഥതയിലുള്ള എക്സാലോജിക് സൊല്യൂഷൻസ് കമ്പനിക്ക്, നൽകാത്ത ഐടി സേവനങ്ങളുടെ പേരിൽ സി.എം.ആർ.എൽ ലക്ഷക്കണക്കിന് രൂപ കൈമാറിയെന്ന് സീരിയസ് ഫ്രോഡ് ഇൻവെസ്റ്റിഗേഷൻ ഓഫീസ് (SFIO) കണ്ടെത്തിയിരുന്നു. ഇതിന്റെ പശ്ചാത്തലത്തിലാണ് കള്ളപ്പണം വെളുപ്പിക്കൽ നിരോധന നിയമപ്രകാരം ഇ.ഡി അന്വേഷണം ആരംഭിച്ചത്.
കേസുമായി ബന്ധപ്പെട്ട് മുൻപ് സി.എം.ആർ.എൽ ഉദ്യോഗസ്ഥർക്ക് ഇ.ഡി സമൻസ് അയക്കുകയും പരിശോധനകൾ ആരംഭിക്കുകയും ചെയ്തിരുന്നു. എന്നാൽ, ചോദ്യം ചെയ്യലിന്റെ പേരിൽ ഇ.ഡി തങ്ങളെ പീഡിപ്പിക്കുകയാണെന്നും കമ്പനിക്കെതിരെ അന്വേഷണം നടത്താൻ ആവശ്യമായ തെളിവുകൾ ഇ.ഡിയുടെ പക്കലില്ലെന്നും ചൂണ്ടിക്കാണിച്ചാണ് ഉദ്യോഗസ്ഥർ കോടതിയെ സമീപിച്ചിരുന്നത്. എന്നാൽ ഈ വാദങ്ങൾ തള്ളിയ കോടതി ഉത്തരവോടെയാണ് ഇപ്പോൾ മുഖ്യമന്ത്രിയുടെ വീടുകളിലേക്ക് ഉൾപ്പെടെ ഇ.ഡി അന്വേഷണം വ്യാപിപ്പിച്ചിരിക്കുന്നത്.
