തമിഴ്നാട്ടിലും പശ്ചിമ ബംഗാളിലും സർവ്വകാല റെക്കോർഡുകൾ ഭേദിച്ച് മികച്ച പോളിംഗ് രേഖപ്പെടുത്തി. തമിഴ്നാട്ടിലെ 234 നിയമസഭാ മണ്ഡലങ്ങളിലേക്ക് നടന്ന വോട്ടെടുപ്പിൽ വൈകുന്നേരം 6 മണി വരെ ഏകദേശം 85 ശതമാനം പോളിംഗ് ആണ് റിപ്പോർട്ട് ചെയ്തത്. ഇതുവരെ 4.7 കോടി വോട്ടർമാർ തങ്ങളുടെ സമ്മതിദാനാവകാശം വിനിയോഗിച്ചു. ചെന്നൈ ഉൾപ്പെടെയുള്ള പ്രധാന കേന്ദ്രങ്ങളിൽ മികച്ച ജനപങ്കാളിത്തമാണ് ദൃശ്യമായത്. 2011-ലെ റെക്കോർഡ് മറികടന്നുകൊണ്ടുള്ള ഈ മുന്നേറ്റം സമാധാനപരമായിരുന്നു. മുഖ്യമന്ത്രി എം.കെ. സ്റ്റാലിൻ, ടി.വി.കെ. അധ്യക്ഷൻ വിജയ്, എ.ഐ.എ.ഡി.എം.കെ. ജനറൽ സെക്രട്ടറി എടപ്പാടി പളനിസാമി തുടങ്ങിയ പ്രമുഖർ വിവിധയിടങ്ങളിൽ വോട്ട് രേഖപ്പെടുത്തി.
അതേസമയം, പശ്ചിമ ബംഗാളിൽ ഒന്നാം ഘട്ട വോട്ടെടുപ്പിൽ വൈകുന്നേരം 6 മണി വരെയുള്ള കണക്കുകൾ പ്രകാരം പോളിംഗ് ശതമാനം 90 കടക്കുമെന്നാണ് സൂചന. വോട്ടെടുപ്പിനിടെ ചിലയിടങ്ങളിൽ സംഘർഷങ്ങൾ റിപ്പോർട്ട് ചെയ്തിട്ടുണ്ട്. ഔദ്യോഗിക പോളിംഗ് സമയം അവസാനിച്ചെങ്കിലും 6 മണിക്ക് മുമ്പ് ബൂത്തിലെത്തിയവർക്ക് സ്ലിപ്പ് നൽകി വോട്ട് ചെയ്യാൻ അവസരം നൽകിയിട്ടുണ്ട്. അന്തിമ കണക്കുകൾ പുറത്തുവരുമ്പോൾ ഇരു സംസ്ഥാനങ്ങളിലെയും ശതമാനക്കണക്കുകളിൽ നേരിയ മാറ്റങ്ങൾ ഉണ്ടായേക്കാം.
