തിരുവനന്തപുരം: കോൺഗ്രസിന്റെ നിയമസഭാ തെരഞ്ഞെടുപ്പ് പ്രചാരണങ്ങൾക്ക് ആവേശം പകരാനായി എഐസിസി ജനറൽ സെക്രട്ടറി പ്രിയങ്ക ഗാന്ധി ഇന്ന് കേരളത്തിലെത്തും. രാവിലെ തിരുവനന്തപുരത്ത് വിമാനമിറങ്ങുന്ന പ്രിയങ്ക, ചിറയിൻകീഴ് മണ്ഡലത്തിലെ പൊതുയോഗത്തിലാണ് ആദ്യം പങ്കെടുക്കുക. തുടർന്ന് കൊല്ലം ജില്ലയിലെ വിവിധ പ്രചാരണ പരിപാടികളിലും അവർ ഭാഗമാകും. വൈകുന്നേരം തിരുവനന്തപുരം വട്ടിയൂർക്കാവിൽ നടക്കുന്ന വിപുലമായ പൊതുസമ്മേളനത്തെ പ്രിയങ്ക ഗാന്ധി അഭിസംബോധന ചെയ്യും.
പ്രചാരണ വേളയിൽ സംസ്ഥാനത്തെ രാഷ്ട്രീയ സാഹചര്യങ്ങൾ പ്രിയങ്ക പ്രധാന ചർച്ചാവിഷയമാക്കിയേക്കും. സിപിഎം-ബിജെപി ഡീൽ, ശബരിമല വിവാദം, സ്വർണ്ണക്കള്ളക്കടത്ത് തുടങ്ങിയ വിഷയങ്ങൾ ഉയർത്തിക്കാട്ടി സർക്കാരിനെതിരെ അവർ ആഞ്ഞടിക്കാനാണ് സാധ്യത. വരും ദിവസങ്ങളിൽ കൂടുതൽ ദേശീയ നേതാക്കളും താരപ്രചാരകരും യുഡിഎഫിനായി കേരളത്തിലെത്തും. അതേസമയം, മുഖ്യമന്ത്രി പിണറായി വിജയൻ ഇന്ന് കോഴിക്കോട് ജില്ലയിലാണ് തിരഞ്ഞെടുപ്പ് പ്രചാരണത്തിന് നേതൃത്വം നൽകുന്നത്.
