ദില്ലി: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ടുള്ള പ്രതിഷേധങ്ങളിൽ നിന്ന് താൽക്കാലികമായി പിന്മാറുന്നതായി സൂചന നൽകി കോക്ക് റോച്ച് ജനത പാർട്ടി (CJP). വരാനിരിക്കുന്ന ഉത്സവകാലം സമരരംഗത്തുള്ളവർ തങ്ങളുടെ കുടുംബത്തോടൊപ്പം ചെലവഴിക്കണമെന്ന് പാർട്ടി സ്ഥാപകൻ അഭിജീത് ദീപ്കെ സമൂഹമാധ്യമങ്ങളിലൂടെ ആവശ്യപ്പെട്ടു.
ജന്തർ മന്തറിലെ പ്രതിഷേധവുമായി ബന്ധപ്പെട്ട് അശുതോഷ് റങ്ക, സൗരവ് ദാസ് എന്നിവരുടെ ജാമ്യം നിഷേധിക്കപ്പെട്ടതും, സി.ജെ.പിക്കെതിരെ ക്രൈംബ്രാഞ്ച് അന്വേഷണം ആരംഭിച്ചതും പാർട്ടിയെ സമ്മർദ്ദത്തിലാക്കിയിരുന്നു. ഈ പശ്ചാത്തലത്തിലാണ് പ്രതിഷേധങ്ങളിൽ നിന്നുള്ള താൽക്കാലിക പിന്മാറ്റ സൂചന.
കൂടാതെ, ഒരു വർഷത്തേക്ക് പൊതുസമാധാനത്തെ ബാധിക്കുന്ന ഒരു പ്രവർത്തനത്തിലും ഇടപെടാൻ പാടില്ലെന്ന ‘പീസ് ബോണ്ട്’ വ്യവസ്ഥയുടെ അടിസ്ഥാനത്തിലാണ് അഭിജീത് ദീപ്കെയെ ജാമ്യത്തിൽ വിട്ടയച്ചത്. ഈ നിയമപരമായ നിബന്ധനയും പാർട്ടിയെ വലിയ പ്രതിസന്ധിയിലാക്കുന്നുണ്ട്.
