ഒഡേസ തീരത്ത് ചരക്കുകപ്പലിന് നേരെ റഷ്യൻ ആക്രമണം; കാസർകോട് സ്വദേശി അഖിൽ ജോയൻ കൊല്ലപ്പെട്ടു

ദില്ലി: യുക്രെയ്നിലെ ഒഡേസ തീരത്തിന് സമീപം ഭക്ഷ്യധാന്യങ്ങളുമായി സഞ്ചരിച്ചിരുന്ന ഗോൾഡൻ ലിയോ എന്ന ചരക്കുകപ്പലിന് നേരെ റഷ്യൻ ആക്രമണം നടന്നു. ആക്രമണത്തിൽ കാസർകോട് വെള്ളരിക്കുണ്ട് എകെജി നഗർ സ്വദേശിയായ അഖിൽ ജോയൻ (26) ഉൾപ്പെടെ കപ്പലിലുണ്ടായിരുന്ന 10 നാവികർ കൊല്ലപ്പെട്ടതായി റിപ്പോർട്ടുകളുണ്ട്. ഇന്ത്യൻ, സിറിയൻ സ്വദേശികളായ നാവികരാണ് കപ്പലിലുണ്ടായിരുന്നത്. ആകെ 17 പേരാണ് കപ്പലിൽ ഉണ്ടായിരുന്നത്. ഇവരിൽ എട്ട് പേരെ യുക്രെയ്ൻ നാവികസേന രക്ഷപ്പെടുത്തിയതായി അധികൃതർ അറിയിച്ചു. ആക്രമണത്തിൽ യുക്രെയ്ൻ സ്വദേശിയായ ഒരു പൈലറ്റും കൊല്ലപ്പെട്ടു. ജൂലൈ 20ന് ശേഷം കരിങ്കടൽ മേഖലയിൽ ആക്രമിക്കപ്പെടുന്ന ഏഴാമത്തെ കപ്പലാണ് ഗോൾഡൻ ലിയോ. സമീപ ദിവസങ്ങളിൽ റഷ്യൻ നഗരങ്ങൾക്കെതിരെ യുക്രെയ്ൻ ശക്തമായ ആക്രമണങ്ങൾ നടത്തിയതിന് പിന്നാലെയാണ് ഈ പുതിയ ആക്രമണം നടന്നത്.