തിരുവനന്തപുരം: ദിവസങ്ങൾ നീണ്ട ആകാംക്ഷകൾക്കും രാഷ്ട്രീയ ചർച്ചകൾക്കും വിരാമമിട്ട് വി.ഡി. സതീശനെ കേരളത്തിന്റെ പുതിയ മുഖ്യമന്ത്രിയായി കോൺഗ്രസ് ഹൈക്കമാൻഡ് പ്രഖ്യാപിച്ചു. ഡൽഹിയിൽ എഐസിസി വിളിച്ചുചേർത്ത പ്രത്യേക വാർത്താസമ്മേളനത്തിലാണ് നിർണായക തീരുമാനം പുറത്തുവിട്ടത്. എഐസിസി നിരീക്ഷകരായ മുകുൾ വാസ്നിക്, അജയ് മാക്കൻ, കേരളത്തിന്റെ ചുമതലയുള്ള ജനറൽ സെക്രട്ടറി ദീപാദാസ് മുൻഷി എന്നിവർ ചേർന്നാണ് പ്രഖ്യാപനം നടത്തിയത്. നിയമസഭാ തിരഞ്ഞെടുപ്പിലെ യുഡിഎഫിന്റെ ഉജ്ജ്വല വിജയത്തിന് പിന്നാലെ 11 ദിവസമായി തുടർന്ന അനിശ്ചിതത്വത്തിനാണ് ഇതോടെ അന്ത്യമായത്.
മുഖ്യമന്ത്രി പദത്തിനായി കെ.സി. വേണുഗോപാൽ, രമേശ് ചെന്നിത്തല എന്നിവരുടെ പേരുകൾ അവസാന നിമിഷം വരെ സജീവമായി പരിഗണിക്കപ്പെട്ടിരുന്നു. എന്നാൽ, തിരഞ്ഞെടുപ്പ് പ്രചാരണത്തിന് ചുക്കാൻ പിടിച്ചതും പ്രതിപക്ഷ നേതാവെന്ന നിലയിൽ സർക്കാരിനെതിരെ ശക്തമായ പോരാട്ടം നയിച്ചതും വി.ഡി. സതീശന് അനുകൂല ഘടകങ്ങളായി. ജനകീയ മുഖമെന്ന നിലയിലും ഹൈക്കമാൻഡ് സതീശന്റെ പേരിന് അന്തിമ അംഗീകാരം നൽകുകയായിരുന്നു. പ്രഖ്യാപനത്തിന് പിന്നാലെ തിരുവനന്തപുരം ഉൾപ്പെടെയുള്ള നഗരങ്ങളിൽ കോൺഗ്രസ് പ്രവർത്തകർ വലിയ ആഘോഷങ്ങൾ ആരംഭിച്ചിട്ടുണ്ട്.
പുതിയ മുഖ്യമന്ത്രിയെ നിശ്ചയിച്ചതോടെ ഇനി മന്ത്രിസഭാ രൂപീകരണത്തിനായുള്ള ചർച്ചകളിലേക്ക് യുഡിഎഫ് കടക്കും. മുസ്ലിം ലീഗ് ഉൾപ്പെടെയുള്ള ഘടകകക്ഷികൾക്ക് മന്ത്രിസഭയിൽ നിർണായക വകുപ്പുകൾ ലഭിക്കുമെന്നാണ് സൂചനകൾ. വരും ദിവസങ്ങളിൽ തന്നെ സത്യപ്രതിജ്ഞാ ചടങ്ങുകൾ സംബന്ധിച്ച ഔദ്യോഗിക അറിയിപ്പുകൾ ഉണ്ടാകും. സതീശന്റെ നേതൃത്വത്തിലുള്ള പുതിയ സർക്കാർ അധികാരമേൽക്കുന്നതോടെ കേരള രാഷ്ട്രീയത്തിൽ പുതിയൊരു അധ്യായത്തിനാണ് തുടക്കമാകുന്നത്.
