തിരുവനന്തപുരം: സംസ്ഥാനത്ത് കഴിഞ്ഞ പത്ത് വർഷം അധികാരത്തിലിരുന്ന എൽഡിഎഫ് സർക്കാർ മുന്നോട്ടുവെച്ച കെ-റെയിൽ (സിൽവർ ലൈൻ) പദ്ധതിക്ക് പകരം പുതിയ അതിവേഗ റെയിൽ പാത നടപ്പാക്കാൻ ഒരുങ്ങി യുഡിഎഫ് സർക്കാർ. കേരളത്തിന്റെ വടക്കേയറ്റം മുതൽ തെക്കേയറ്റം വരെ അതിവേഗത്തിൽ ബന്ധിപ്പിക്കുന്ന പുതിയ റെയിൽപാതയാണ് മുഖ്യമന്ത്രി വി.ഡി. സതീശന്റെ നേതൃത്വത്തിലുള്ള പുതിയ സർക്കാർ ലക്ഷ്യമിടുന്നത്. സിൽവർ ലൈൻ പദ്ധതിയുമായി മുന്നോട്ട് പോകില്ലെന്നും, അതിന് പകരമായി പരിസ്ഥിതി സൗഹൃദവും പ്രായോഗികവുമായ മറ്റൊരു അതിവേഗ പാത യാഥാർത്ഥ്യമാക്കുമെന്നുമാണ് യുഡിഎഫ് സർക്കാർ വ്യക്തമാക്കുന്നത്.
ഈ പുതിയ റെയിൽ പദ്ധതിയുടെ രൂപരേഖ തയ്യാറാക്കുന്നതിന്റെ ഭാഗമായി ‘മെട്രോ മാൻ’ ഇ. ശ്രീധരനുമായി മുഖ്യമന്ത്രി വി.ഡി. സതീശൻ ഇന്ന് നിർണായക കൂടിക്കാഴ്ച നടത്തും. തിരുവനന്തപുരത്ത് വെച്ച് വൈകുന്നേരമാണ് മുഖ്യമന്ത്രി ഇ. ശ്രീധരനെ നേരിൽ കാണുന്നത്. മുൻപ് സിൽവർ ലൈൻ വിവാദമായ സമയത്ത് ഇ. ശ്രീധരൻ തന്നെ മുന്നോട്ടുവെച്ചിരുന്ന ബദൽ അതിവേഗ റെയിൽ പാതയുടെ നിർദ്ദേശങ്ങൾ ഈ യോഗത്തിൽ പ്രധാന ചർച്ചാവിഷയമാകും. ഇ. ശ്രീധരന്റെ സാങ്കേതിക വൈദഗ്ധ്യവും നിർദ്ദേശങ്ങളും പരിഗണിച്ച് പുതിയ പദ്ധതിയുടെ പ്രാരംഭ നടപടികളിലേക്ക് കടക്കാനാണ് സർക്കാർ തീരുമാനം.
