തിരുവനന്തപുരം തമ്പാനൂരിലെ ഹോട്ടലിൽ വൻ തീപിടുത്തം; ആളുകളെ ഒഴിപ്പിച്ചു
തിരുവനന്തപുരം: നഗരമധ്യത്തിലെ തമ്പാനൂരിലുള്ള ഹോട്ടൽ ഹൈലാൻഡിൽ വൻ തീപിടുത്തം. ഹോട്ടലിന്റെ ആറാം നിലയിലും രണ്ടാം നിലയിലുള്ള റെസ്റ്റോറന്റിന്റെ അടുക്കളയിലുമാണ് തീ പടർന്നത്. അപകടത്തെ തുടർന്ന് ഹോട്ടലിൽ താമസിച്ചിരുന്ന മുഴുവൻ ആളുകളെയും ഉദ്യോഗസ്ഥർ സുരക്ഷിതമായി പുറത്തെത്തിച്ചു. നിലവിൽ മൂന്ന് യൂണിറ്റ് ഫയർഫോഴ്സ് സ്ഥലത്തെത്തി തീ അണയ്ക്കാനുള്ള ശ്രമങ്ങൾ ഊർജ്ജിതമായി തുടരുകയാണ്. അടുക്കളയിൽ നിന്നാണ് തീ പടർന്നതെന്നാണ് പ്രാഥമിക വിവരമെങ്കിലും തീപിടുത്തത്തിന്റെ കൃത്യമായ കാരണം ഇതുവരെ വ്യക്തമായിട്ടില്ല. ഹോട്ടലിന്റെ മറ്റ് നിലകളിലേക്ക് തീ പടരാതിരിക്കാനുള്ള മുൻകരുതലുകൾ ഫയർഫോഴ്സ് സ്വീകരിച്ചിട്ടുണ്ട്.
